Reutilizar xeneraría diez veces más emplegu que la incineradora

El Consorciu Cívicu plantega una propuesta de xestión que produciría menos fracción pa vertederu que la futura planta de Serín, proponiendo'l reciclaxe y la recoyida selectivo. 

Unes midíes que crearíen diez veces más emplegu que la planta incineradora y xeneraría una fracción restu pa vertederu tovía menor que la cantidá d'escoaries y povises resultantes de la quema. Son les estimaciones del espertu en reciclaxe Joan Marc, qu'esta tarde pronuncia una conferencia na Universidá d'Uviéu, y les conclusiones de la propuesta d'alternativa sostenible a la potencial instalación de Coxersa, plantegada pol Consorciu Cívicu.

El presidente de la Unión de Consumidores, Dacio Alonso, el presidente de la Confederación d'Asociaciones de Vecinos (Cavastur), Vicente Gutiérrez Solís, y el representante de Ecoloxistes n'Aición, Paco Ramos, presentaron güei en rueda de prensa esta propuesta, acompañaos por Marc. Les trés formaciones, xunto cola Asociación pa la Defensa de la Sanidá Pública, conformen el consorciu creáu pa buscar alternatives a la instalación de la incineradora en Serín.
  
Joan Marc, espertu en xestión avanzada de residuos y coordinador de l'Alianza Global contra la Incineración, va ser tamién el coordinador d'esta alternativa, según informó Alonso. El convidáu estimó que'l reciclaxe y la recoyida selectivo podría xenerar n'Asturies, al traviés de la industria de la recoyida, sobre diez vegaes más emplegu que los 80 puestos de trabayu que se prevén pa la planta de Serín. Como exemplos, señaló países como Bélxica o zones como Flandes, n'Europa, nes que s'aplicaron esti tipu d'alternatives. En Flandes, onde él reside, esplicó que la recoyida pasó d'un 20% a un 80% nos últimos años.
  
Como más cercanu utilizó l'exemplu de la población guipuzcoana d'Usurbil, onde "punxeron en marcha un sistema de recoyida puerta a puerta", algamando unes cifres asemeyaes de recoyida selectivo.
  
Señaló amás qu'esti tipu d'alternativa nun ye un "oxetivu quiméricu". "Créase una industria de recoyida, xenérase compostaxe cola materia orgánico pal suelu, promoviendo l'agricultura ecolóxico, produzse menos contaminación y favorezse la economía social", señaló en referencia, por casu, a la reutilización de ropa usada.
  
"Siempre ye más beneficioso reutilizar les coses que quemar", añadió, en recordando que na UE "existen un bon númberu de directives" qu'encamienten a los gobiernos a actuar nesti sentíu.
 
Reciclar xenera menos fracción restu que quemar
 
El principal puntu de l'alternativa presentada güei pol Consorciu básase na comparanza de la fracción resto pa vertederu xenerada pola recoyida y la reutilización, y la producida en forma de povises y escorias pola incineración. Paco Ramos recordó que nun se trata d'un alderique ente incineradora o vertederu, porque "la incineradora tamién precisa un vertederu", polo qu'hai que considerar "qué tipu de vertederu conviennos más".
  
Asina, según el documentu espuestu por él mesmu, a partir del 2020, mientres la materia que saldría de la incineradora pal vertideru algamaría les 128.000 tonelaes, la fracción restu de la "alternativa sostenible" taría perbaxo de 120.000, y siguiría baxando pasu ente pasu hasta unes hipotétiques 90.000 tonelaes nel 2040. Mentanto, l'unvíu de residuos a vertederu pola quema caltendríase en 128.000.
  
El documentu recuerda que nel añu 2008 el total de residuos recuperaes n'Asturies, en comparanza colos oxetivos máximos y mínimos fixaos pola UE, ye mínimu (unes 20.000 tonelaes valorizadas frente a más de mediu millón).
  
L'alternativa plantega un modelu d'aprovechamientu qu'amenorgaría progresivamente la cifra total de residuos creada. Del total de basura xenerada, el Consorciu propón un programa que, a partir del 2015, dexaría unes 160.000 tonelaes de fracción restu pal verte0deru, esto ye un terciu del total de residuos. El restu sería material recicláu (80% del material inorgánico) o compostado (65% del material orgánico) que se valorizaría. A partir del 2020 la fracción restu sería cada vez menor y el total valorizáu cada vez mayor.  
  
Según Alonso, estos datos demuestren "que ye posible una alternativa vidable y razonable a la incineración". Esplicó amás que la intención del Consorciu ye facer llegar esta propuesta al Gobiernu autonómicu, a los grupos parlamentarios de la Xunta Xeneral y a tolos Conceyos d'Asturies, pa tratar de "crear un consensu sin escluyir a naide".