San Patrick's pun-folk fest

El grupu checu de punk-folk 'Pipes & Pints' va compartir esti vienres escenariu nel pub La Antigua Estación colos asturianos Sambre y Taranus, nel festival 'San Patrick's Pun-Folk Fest', entamáu pola productora y distribuidora Algamar.
  
Pipes & Pints van presentar el so nuevu trabayu 'Until we die'. Según informó Algamar, al traviés d'una nota de prensa, "lleven unos años trabayando duro pa tornar na nueva referencia europea del punk-folk, con unos soníos directos que s'asemeyen a la llinia yá trazada por grupos consagraos como The Pogues, Floggin Molly o los Dropkick Murphys". Acaben de llanzar un nuevu LP, "Until we die", al traviés de los sellos Wolverine Records n'Europa y n'Impenitente Records en Norteamérica y Suramérica. "Caracterícense por un espectáculu en directo rotundamente arrollador, frescu y que nun dexa a naide indiferente", comenta'l comunicáu.
  
Sambre, pela so parte, son la "nueva referencia del rock-folk fechu n'Asturies". La banda xixonesa presenta la primer vez na capital asturiana'l so primer discu, tituláu 'Na solombra', una de les primeres ediciones discográfiques musicales de Algamar Producciones.
  
Hasta la grabación d'esti discu participaron nel álbum de versiones de Dixebra 'Perversiones' col tema 'Asturcón' y nel recopilatoriu 'Calzada News vol. 2' con 'Atravesáu pelos chigres'. "Na solombra" ye un discu fundamentalmente de rock'n'roll con infuencia del folk, onde les guitarres eléctriques y la distorsión comparten espaciu con instrumentos acústicos como'l violín, la gaita o la mandolina.
    
Taranus surde nel añu 1994, formáu por un grupu d'estudiantes con más ganes que recursos intentando dar un xiru a la música asturiana. La idea inicial yera entemecer ritmos heavy y rock con folk tradicional. Tres unos años de rodaxe, nel 2008, Taranus resurde con fuerza con un cambiu de componentes y nuevos cantares.
  
El conciertu va ser el próximu vienres, 19 de marzu, a partir de les 20.00 en La Antigua Estación.