Xosé Miguel Suárez analiza'l teatru popular n'eonaviegu

Ámbitu espubliza’l primer estudiu del teatru n’eonaviegu que se representó pel occidente nos años 30, ‘El Teatro Aldeano da Biblioteca Popular Circulante de Castripol (1929-1934)’.

Nesti volume, Xosé Miguel Suáres Fernández estudia ún de los fenómenos culturales y lliterarios más llamativos del sieglu XX n’Asturies: la representación d’obres de teatru –con marionetes o con actores reales– escrites n’eonaviegu pelos conceyos más occidentales del país. Amás, apurre la edición de los testos, inéditos hasta la fecha.
 
A primeros de la década de los años trenta del sieglu XX, la Biblioteca Popular Circulante de Castripol (BPCC) vivió una esperiencia teatral basada nos títeres, nes farses, nos entremeses y na tradición folclórica. Neses actividaes, l’usu de la llingua propia de la tierra tuvo una importancia fundamental. De la mano de los hermanos Manolo y Paco Marinero, y del llabor anónimu d’otros collaboradores de la BPCC, adaptáronse y escribiéronse obres pa representar en guiñol o con actores reales.
 
‘El Teatro Aldeano da Biblioteca Popular Circulante de Castripol (1929-1934)’ vien a destacar la vinculación estética y ideolóxica del llabor d’esta institución del occidente asturianu con otres iniciatives apaecíes que se dieron n’España naquellos años de la República, al mesmu tiempu que recupera unos testos inéditos que suponen una sorpresa pa la historia del teatru n’Asturies.
 
P’ayudar a poner nel so contestu’l teatru de la BPCC, faise un recorríu pela historia d’esta iniciativa bibliotecaria y de los sos protagonistes, estúdiase l’actitú énte la llingua propia de les minoríes intelectuales del estremu occidental d’Asturies y dase noticia del teatru fechu n’eonaviegu enantes d’esos anos.
 
L’análisis de caúna de les nueve pieces teatrales recuperaes —Noche aldeana, Xan da Xata, Los tres ciegos, Os chirlosmirlos, A empanada y tarta, Xan Cabrito (pra Currillos), Xan Cabrito (pra Teatro Aldeano), La moza coqueta y El tostador—, da pasu a la segunda parte del llibru, la edición de les obres, que se fixo siempre col criteriu d’axuntar l’interés históricu col divulgativu.