Netanyahu afirma qu'Israel va siguir construyendo en Xerusalén

El primer ministru israelín, Benjamin Netanyahu, afirmó qu'Israel va siguir construyendo en Xerusalén de la mesma manera que lo fizo mientres los últimos 42 años.

"La construcción en Xerusalén y n'otros llugares va siguir de la mesma manera que foi habitual nos postreros 42 años", aseguró mientres una xunta del partíu Likud. Netanyahu nun trató la crisis diplomática con Estaos Uníos depués d'esti anunciu pero, cuando un miembru del partíu preguntó qué asocedería'l próximu mes de setiembre -mes nel qu'acaba la moratoria de la construcción nes colonies de Cixordania de diez meses-, Netanyahu respondió que la construcción va siguir igual.

"La decisión del Conseyu de Ministros de terminar la moratoria de la construcción en diez meses sigue vixente", indicó Netanyahu recoyíu pol diariu israelín 'Haaretz'.
  
Mientres, el ministru de Defensa, Ehud Barak, pidió güei al Gobiernu que trabaye p'acabar cola crisis diplomática sobre la construcción israelí en Xerusalén Esti y pa consiguir el regresu a les conversaciones de paz colos palestinos. El Gobiernu tien de facer un esfuerzu pa "qu'esta crisis s'olvide y pa que les conversaciones indirectes y, darréu, directes, vuelvan al camín correctu", manifestó Barak.
  
Barak tamién indicó qu'aconceyó con autoridaes norteamericanes pa falar sobre les midíes necesaries p'avanzar. "Les conversaciones de paz son una prioridá pa Israel y pa tola rexón", aseguró mientres una xunta col Partíu Llaborista israelín. "El procesu políticu interesa al Estáu y ye algo no que cree'l partíu Llaborista. Ye una de les coses que mos caltién nel Gobiernu", remachó.