El PSOE pide en Galicia un consensu pa "salvaguardar" l'idioma propiu

|

El diputáu socialista Ricardo Varela criticó'l proyeutu de decretu del plurilingüismu na enseñanza y llamentó la posición de "soberbia y imposición" mostrada pola Xunta nesta materia.

Énte a esto, esixó que la distribución de les llingües nes aules se debata nel Parllamentu con cuenta de "consensuar" un acuerdu que tenga como fin "salvaguardar" l'idioma propiu de Galicia.
  
Preguntáu por esta cuestión en rueda de prensa, recordó que los sos compañeros de partíu reclamaron dende'l primer momentu que'l nuevu decretu se debatiere na Cámara autonómica, coles mires de diseñar "un camín conxuntu" pal desarrollu llingüísticu.
  
"La llingua nunca tuvo de ser un elementu de confrontación", sentenció'l tamién vicesecretariu del Parlamentu, que censuró que'l PPdeG utilizara esta materia d'esta manera pa llograr "unos cuantos votos".
  
A mayores, sobre'l votu en contra de PP y PSdeG na Mesa del Parllamentu, qu'evitó la entrada na Cámara de la iniciativa lexislativa popular (ILP) de 'Queremos Galego' pa fomentar l'usu del gallegu, Varela xustificó la so postura en "el respetu a les normes".
  
"La Mesa nun s'asitia sobre'l fondu de los asuntos, puesto que nun ye un órganu políticu, sinón de xestión", argumentó, pa calcar nel "rigor" de la dirección de la Cámara nel tratamientu de les cuestiones a les que se da entrada.
 
"Esisten normes"
  
Ello ye qu'anque'l parlamentariu del PSdeG aseguró "compartir dafechu" el conteníu de la ILP, calcó en que "les normes son siempre iguales, con independencia de lo que guste o non".
  
Estes normes tienen por oxetivu llograr que la Cámara "funcione d'una manera seria y rigorosu", según Varela, que señaló qu'esistíen "informes concluyentes" que torgaron qu'esta iniciativa llegara a debatise en plenu. Sicasí, el BNG asumió'l testu de la ILP pa facer que se trate esta cuestión nel hemiciclu.

Contador Estadistiques