Les consultes sobre la independencia lleguen al País Vascu francés

Les consultes sobre la independencia lleguen mañana al País Vascu francés, onde 122 de los 159 conceyos van entrugar si tán a favor de la "creación d'una coleutividá territorial vasca".

En declaraciones a Europa Press, el diputáu d'ERC nel Parlament y miembru de la Coordinadora Nacional para la Consulta sobre la Independencia, de Uriel Bertran, indicó que les consultes fadrán esti domingu y el domingu 21, coincidiendo cola celebración de les eleiciones rexonales franceses.

Esplicó que se van instalar urnes nel esterior de los colexos electorales, onde se  va entrugar a los ciudadanos si tán a favor de que l'Estáu francés dea autonomía política y reconoza el drechu de participación al País Vascu francés. Asina, esixen la creación d'un departamentu francés qu'arrexunte a los tres 'territorios históricos' de Zuberoa, Bere Nafarroa y Lapurdi.
  
La consulta promúevela la plataforma Batera, na que, según Bertran, amás de la esquierda abertzale, participen militantes d'otros partíos nacionalistes vascos. Bertran recordó qu'en Francia, Batasuna ye "llegal".
  
La entruga que se va formular a los ciudadanos ye: '¿Ta usté a favor de la creación d'una coleutividá territorial vasca?'. Espresó la so confianza en que "va haber una alta participación, y a ello va contribuyir la coincidencia colos comicios rexonales".
  
Bertran recordó que 89 alcaldes del País Vascu francés apoyen esta consulta, y aseguró que 1.000 voluntarios van participar nesta iniciativa.
  
El diputáu manifestó que la Coordinadora catalana asesoró a Batera nesti procesu. Prueba d'ello, indicó, "ye que diez alcaldes vascos acudieron como observadores internacionales a les consultes soberanistes que se ficieron el 13 d'avientu".
  
Bertran aseguró que los alcaldes qu'apoyen la consulta recibieron una carta "amenazadora" del prefeutu Philippe Rei, que ye'l representante del Estáu francés nel Departamentu de Pirineos Atlánticos.