Espublízase la primer novela n’eonaviegu

Aurora García Rivas ta acabantes d’espublizar ‘As razóis d’Anxélica’ (Trabe),  la primer novela escrita na llingua más occidental d’Asturies, concretamente na fala de San Tiso.

La novela ta narrada en primera persona pola madre d’una monxa que fai la carrera de Medicina y marcha p’África. La dureza de la vida d’una madre soltera criada nun hospiciu y la vida depués na ciudá van esbillándose nos recuerdos de la madre, al tiempu que se presenta la personalidá decidida de la fía y cómo la so ma va entendiendo les razones que la llevaron a escoyer esi camín.

Esta obra, escrita na variedá más occidental de les fales eonaviegues, va presentase’l sábadu 20 de marzu, a les siete de la tarde, nel auditoriu de San Tiso d’Abres, n'O Chao, nun actu entamáu pola asociación cultural San Tiso del Eo. Tamién va presentase nesi mesmu actu la edición billingüe con una versión en portugués de ‘Contos. Ducía e media d’eles’, de la mesma autora.
 
Esta obra va presentala Armando López Roca, mientres que la presentación de la novela va dir de la mano d’Humberto Gonzali. Van participar tamién la Direutora Xeneral de Política Llingüística, Consuelo Vega, y el Conceyal de Cultura del Conceyu de Xixón, Justo Vilabrille.
 
Aurora García Rivas ye probablemente l’autora más importante de les lletres d’Entrambasaguas. Autora de ‘O viaxeiro da noite’, ‘Cinco contos pra xogar coa música’,  coordinadora de l’antoloxía n’eonaviegu “Na Boca de todos”, tien tamién espublizaos testos en ‘Entrambasaguas’ y ‘Lliteratura’, revistes de l’Academia de la Llingua Asturiana. Amás, coordinó’l I Congresu d’escritores en gallego-asturianu.celebráu’l branu de 2008 n’A Veiga.