ERC quier que nel Congresu puean usase les llingües oficiales

El voceru d'ERC nel Congresu, Joan Ridao, unvió una carta al presidente de la Cámara Baxa, José Bono, na que pidió una reforma del Parllamentu y l'usu de los idiomes oficiales.

Na carta, unviada tamién en nome d'IU y ICV, apuesta por reformar el Reglamentu del Congresu como la meyor fórmula p'habilitar los meses de xineru y xunetu, coles mires de que puean celebrase sesiones plenaries. Eso sí, avisa, de reabrise l'alderique sobre les normes internes del Congresu, la so formación volverá plantegar la regulación del usu de les llingües cooficiales.
  
Con esti escritu, al que tuvo accesu Europa Press, Ridao da respuesta al pidimientu de propuestes p'aumentar l'actividá parlamentaria en xineru y xunetu que la selmana pasada cursó Bono a tolos voceros, colos que, amás, tien previsto caltener una xunta monográfica sobre esta cuestión.
  
En nome del grupu que comparten ERC, IU y ICV, el voceru republicanu empieza la so misiva reivindicando'l trabayu de les sos señoríes y achacando el "cuestionamientu" al que tán sometíos pola opinión pública, "en parte, a la falta d'una correcta conocencia del llabor parllamentariu".