El PP exixe a Areces la convocatoria d'un plenu pa unificar criterios sobre'l nuevu modelu de financiación

|

El presidente del PP n'Asturies, Ovidio Sánchez, exixó güei al xefe del Executivu rexonal, Vicente Álvarez Areces, la convocatoria d'un plenu estraordinariu pa unificar criterios en cuanto a la negociación del nuevu modelu de financiación que permitan "facer fuerte'l mensaxe d'Asturies".

Sánchez, en rueda prensa, destacó que'l PP siempre tuvo la mano tendida nesti asuntu pa poder llograr ser más fuertes "nunos momentos nos que la debilidá d'Asturies ta n'evidencia". Nesti sen, indicó que "sólo la semeya de Zapatero recibiendo a los presidentes d'Asturies y Estremadura a la vez evidencia esa debilidá".

"Ye un casu únicu, una auténtica falta de respetu p'Asturies", dixo Ovidio Sánchez, qu'insistió no "improvisao del conceyu". Nesti sen, aseguró qu'Areces foi al alcuentru ensin tenelu preparáu, por eso "cambia de criteriu cada día y cada vez pide una cosa diferente".

Frente a esa falta de criteriu, Ovidio Sánchez recordó que la posición del PP siempre foi la mesma y destacó que lo que se pide ye que se ponga en marcha'l fondu de compensación interterritorial que permita fomentar la solidaridá y que se revise'l sistema del fondu de reserva financiera.

El presidente de los 'populares' asturianos insistió en que'l PP quier contribuyir al nuevu modelu de financiación baxo les bases de la solidaridá, la unanimidá y la defensa de la igualdá de tolos territorios españoles.

Contador Estadistiques