L'Autoridá Palestina retírase de les conversaciones indireutes con Israel

Mahmud Abbas niégase a participar nes conversaciones indireutes depués de que'l Gobiernu israelín anunciara la construcción de 1.600 viviendes en Xerusalén Este.

Pela so parte, el vicepresidente estadounidense, Joe Biden, que ta de visita na rexón, viose sosprendíu pol anunciu israelín pero insistió na necesidá de que se retomen les conversaciones. El refugu palestín a les conversaciones indireutes llega precedíu d'una serie de reacciones internacionales de condena contra Israel, ente les que se cuenten les d'Estaos Uníos y la Unión Europea.

La consecuencia sobre'l terrenu d'estes crítiques xeneralizaes llegó de boca de la Lliga Árabe y del so secretariu xeneral, Amr Mussa, qu'afirmó que'l presidente de l'Autoridá Palestina, Mahmud Abbas, tresmitiéra-y la so salida de los contautos mediaos por Washington. El líder palestín entiende que nun puen "negociar nes actuales circunstancies", afirmó Mussa dende El Cairo.
  
El pasáu día 3 la Lliga Árabe dio un apoyu crucial a estos contautos y otorgó-yos un plazu de cuatro meses pa que funcionen, anque l'últimu anunciu israelí dexó en suspensu tamién el apoyu rexonal a la entemediación norteamericana.
  
Un asesor d'Abbas, Nabil Abu Rudeina, pidió la retirada inmediata del proyectu de nueves construcciones en Xerusalem Este y reclamó que cuando llegue a Israel l'unviáu especial estadounidense, George Mitchell, -la próxima selmana- prima al Gobiernu de Benjamin Netanyahu pa "dar una oportunidá" a les conversaciones, que tienen como oxetivu volver a entamar los enzancaos contactos directos destinaos a llograr un acuerdu de paz.
  
Abbas reclama una conxelación completa de les obres nos asentamientos hebreos de Cixordania y Xerusalén Este, hipotética capital d'un posible Estáu palestín. Los palestinos ponen este cese de les actividaes como condición pa volver a entamar el diálogu de paz, algo que dende l'Executivu israelín contemplen con matices.
  
Asina, anque en  payares del añu pasáu Israel anunció una moratoria de diez meses pa nueves construcciones en Cixordania, esta midida nun inclúi Xerusalén Este, puesto que como apuntó a Israel Radio'l secretariu de gabinete israelí, Zvi Hauser, "Xerusalén ye la capital d'Israel y la construcción va desarrollase como en cualquier otra ciudá". "Xerusalén ye una gran ciudá (...) que tien que crecer", afirmó, sin confirmar nin desmentir la información apaecida nel periódicu 'Haaretz' y qu'antemana la planificación d'otres 50.000 viviendes na población.
  
Alredor de 200.000 xudíos yá viven n'asentamientos en Xerusalén Este y en zones cercanes, mientres qu'otros 300.000 habiten en suelu cixordanu.
  
La oficina de Netanyahu utilizó nun comunicáu l'argumentu yá aludíu nos últimos díes pela parte hebrea, que se garra al tiempu qu'ha pasar pa que cualquier proyeutu sobro Xerusalén Este se lleve a la práutica. Nesti sen, el plan que contempla 1.600 nueves cases tardaría más d'un añu n'aprobase y dellos más en llevase a la práutica.