UCE estudia llevar a los conceyos a los tribunales polos residuos

Los serviciu xurídicos de la Unión de Consumidores d'Asturies tán estudiando llevar a los tribunales a los conceyos asturianos que nun cumplen cola normativa en materia de residuos.

Asina lo manifestó güei'l presidente d'UCE, Dacio Alonso, que manifestó que nun se pue olvidar que la xestión de les residuos ye competencia de los ayuntamientos.
  
Dacio Alonso presentó güei en rueda de prensa l'informe xurídicu ellaboráu pol consorciu cívicu que se creó pa presentar una propuesta alternativa a la instalación de la incineradora, y nel cual se reflexen les obligaciones de les alministraciones públiques en materia de xestión y tratamientu de los residuos d'orixe caseru.
  
El presidente d'UCE indicó qu'esta ye la tercer acción del consorciu cívicu, qu'unvió dichu informe a la Federación Asturiana de Conceyos, FACC, y al conseyu de Gobiernu, concretamente al conseyeru y presidente de Coxersa, Francisco González Buendía, pa que seyan conscientes de que tán imcumpliendo les obligaciones llegales.
  
"Tán mintiendo a los ciudadanos cuando dicen que la xestión de residuos ye un problema técnicu porque en realidá trátase d'un problema políticu", dixo Alonso, que recordó que la direutiva d'obligáu cumplimientu ofrez la incineración como "penúltima alternativa" y n'Asturies quier "pervertise la llei faciendo d'ella la principal opción".
  
Nesti sen calcó en que los conceyos nun cumplen nin cola reducción de residuos, la reutilización y reciclaxe y la revalorización, que son les sos obligaciones llegales polo que mostró la so preocupación a que lo ficieren de manera deliberada pa xustificar nesti momentu la necesidá d'una planta incineradora como única solución.
  
Dacio Alonso mostróse convencíu de que la ciudadanía "va ganar la batalla" porque afirmó que van demostrar qu'hai otres propuestes alternatives a la incineración como única salida para los residuos. Asina destacó que la próxima selmana van contar cola presencia d'espertos de la UE na materia pa qu'espliquen a los asturianos los modelos de xestión alternativos.