Nuevas Generaciones d'Asturies pon en valor la figura de Cascos

El presidente de Nuevas Generaciones, Pablo Álvarez-Piré, dixo que Cascos foi un "gran vicepresidente, ministru y un patrimoniu" del PP, ¿quién pue negase a él?".

El dirixente asturianu de NNGG respondía asina, nuna rueda de prensa n'Uviéu, al entruga-y sobre si comparte la opinión de determinaes xuntes llocales de Nuevas Generaciones como les de Mieres, Llanes, Ribesella, Pravia o Siero que pidieron públicamente que seya Cascos el qu'encabece la candidatura del PP a la Presidencia del Principáu d'Asturies nes elecciones rexonales del 2011.
  
"Yo creo que'l posicionamientu ye claro per parte del partíu; nun hai oposición de nengún tipu a cualquier candidatu, tamos abiertos a toles propuestes", añadió. Amás, dixo que la eleición del candidatu ye un tema que pertenez a la dirección nacional y rexonal del PP. "Nós vamos apoyar lo que salga del partíu", apuntó.
 
Aznar
  
D'otru llau, Pablo Álvarez-Piré nun quixo referise a les esplicaciones que dio l'ex presidente del Gobiernu, José María Aznar, al xestu que dedicó a un grupu de mozos que lu faltaron na Universidá d'Uviéu, onde acudió a dar una conferencia. L'actu entamáronlu Nuevas Generaciones d'Asturies el pasáu 28 de febreru. Aznar, nuna entrevista al diariu italianu 'Il Giornale' declaró que nun s'arrepiente d'enseñar a los que protestaben el so deu corazón porque "coles persones descaraes la respuesta tien de ser descarada".
  
Álvarez-Piré nun opinó sobre les manifestaciones d'Aznar y llendóse a dicir que la presencia d'Aznar na Universidá d'Uviéu foi un "actu maravillosu" nel que participaron más de 500 mozos