El Bloque quier que nun se permita una concentración neonazi n’Uviéu

Un grupu neonazi quier concentrase esti sábadu n’Uviéu y el Bloque por Asturies pide a la Delegación del Gobiernu que faiga como en Madrid y nun dea permisu.

La organización solicita al Delegáu del Gobiernu español n’Asturies, Antonio Trevín, que nun autorice la concentración que tien pensao facer el grupu neonazi Movimiento Social Republicano, esti sábadu día 13 a les 12 de la mañana na Plaza l’Ayuntamientu d’Uviéu.
 
Según el Bloque, MSN tien un discursu antisistema, pero esclarien que detrás namás s’escuenden idees racistes y homófobes. “En tiempos de crisis aprovecha pa echá-yos la culpa de tolos supuestos males de la sociedá occidental a los inmigrantes y tien una obsesión enfermiza contra l’Islam”, afirmen.
 
“Ye conocida de sobra la rellación que gasta con grupos neonazis de toa Europa, y n’Asturies igual que faen otros grupos de la mesma ideoloxía usa los campos de fútbol pa captar xente mozo y esparder les sos idees”, sentencien dende’l Bloque.
 
Según indiquen, el so líder Juan Antonio Llopart ye conocíu pol so pensamientu filonazi y los so militantes poles aiciones violentes contra grupos d’izquierda, inmigrantes, homosexuales, o probes que viven tiraos na cai.
 
Poro, el Bloque por Asturies pide a la Delegación del Gobiernu que tome l’exemplu de Madrid, “onde tienen prohibida una concentración pa esi mesmu día”.