Una asociación madrilana diz que l'autu del TC supón la oficialidá

L'Asociación Nacional por la Libertad Lingüística considera que la sentencia asitia de facto l'asturianu como llingua cooficial ensin qu'asina tea reconocíu nel Estatutu d'Autonomía.

ANLL diz acoyer con respetu "la sentencia del Tribunal Constitucional sobre l'usu del asturianu”, en referencia al autu sobre la constitucionalidá de la Llei d'Usu, pero alvierte “de que” el so usu per parte d'entidaes nacionalistes asturianes pue ser un primer pasu para la creación d'imposiciones llingüístiques n'Asturies.
 
Según afirmen ye lo que se pue ver nes reacciones de partíos y formaciones nacionalistes asturianes, “la sentencia va convertise en guía d'un procesu d'imposición llingüística del asturianu asemeyao a los que yá esisten n'otres Comunidaes Autónomes”.
 
Dende l'ANLL entienden qu'esti procesu va suponer crear artificialmente un conflictu llingüísticu n'Asturies “que nun esiste nuna sociedá onde ensin una demanda evidente pa la cooficialización del asturianu, más allá de formaciones minoritariamente representatives”.
 
L’asociación camienta que’l TC sofita la deriva y el mimetismu llingüísticu de los casos de “verdadera ausencia de llibertá llingüística”, evitando lo indicao na Carta Magna sobro les llingües cooficiales y abre la puerta a un nuevu espaciu d'imposición, “como los que munchos españoles sufren en Cataluña, Galicia, País vascu, Baleares, Aragón o la Comunidá Valenciana”.
 
Dende l’ANLL esclarien que van siguir bien de cerca l'aplicación de la sentencia, “según les práctiques llingüístiques del Principáu d'Asturies”, y va denunciar cualesquier discriminación o atropellu que se lleve a cabu “invocando la resolución del Altu Tribunal”.
 
L’Asociación presentóse en xineru en Madrid como “una respuesta cívica énte quienes al traviés de la imposición y la persecución impiden a miles de persones n’España espresase, educase, o simplemente desarrollar la so vida na llingua oficial del Estáu". Como oxetivu cimeru señalaben denunciar la supuesta imposición de los nacionalismos “instalaos en dellos Gobiernos autonómicos”.
 
El presidente d’ANLL, Pablo Yañéz, ye amás, secretariu de la Federación Norte de Ciudadanos-Partido de la Ciudadanía, y ye quien firma’l comunicáu que l’asociación unvió a esti mediu de comunicación.
 
Esti vallisoletán de 20 años, ye un estudiante de Ciencies Polítiques que nuna entrevista n’ochobre de 2009 sobre la situación de les comunidaes billingües, afirmaba que l’asturianu llevaba diez años furrulando como llingua oficial, “por un decretu de 1998 qu’establez l’asturianu como llingua reconocida nes comunicaciones de y cola alministración”.
 
Amás, dicía que la nuesa llingua taba nes escueles y perestendida nel so usu toponímicu, pero qu’esto a los “grupos nacionalistes” nun-yos sirvía, “tampoco-yos sirve la oficialidá, quieren avances políticos y el Gobiernu autonómicu, casualmente en manes del PSOE, da rienda suelta al procesu d’inmersión qu’acabará cola imposición del asturianu”.