Aznar: "coles persones descaraes, la respuesta tien de ser descarada"

L'ex presidente del Gobiernu, José María Aznar, asegura que nun s'arrepiente "pa nada" de llevantar el deu a los estudiantes que lu urriaben na Universidá d'Uviéu.

Preguntáu al respeuto, Aznar declara que non sólo nun s'arrepiente, sinón que la cosa produz-y "risa". "Coles persones descaraes la respuesta tien de ser descarada", añade nuna entrevista al diariu italianu 'Il Giornale'.
 
"Acción suicida" de Zapatero
 
A lo llargo de la entrevista, l'ex presidente del Gobiernu acusa a Zapateru de convertir España nun "antroxu" y esconder la so "incapacidá" y "incompetencia" a base de "retórica" y "golpes d'escena".
  
Según Aznar, el "error principal" de Zapatero foi "paralizar les reformes económiques que convirtieren a España nel país más dinámicu d'Europa" y depués, "escondió la cabeza baxo l'arena", negando la crisis.
  
Con too, l'acción de Gobiernu de Zapatero foi "suicida", puesto que "elevó los gastos y les deudes", mientres que "agora son los españoles los que tienen que pagar too esto" y "el preciu ye un paru a niveles mui altos".