El PP d'Avilés diz quel Beltaine tien factures ensin xustificar

La conceyala del PP Carmen Vega acusó al conceyal de Cultura, Román Antonio Álvarez, d'aceptar cinco factures por valor de 16.533 euros pola organización del festival Beltaine.

Según la conceyala conservadora, les factures nun tan xustificaes. En rueda de prensa, la conceyala indicó qu'esti dineru usóse pa pagar dietes a los voluntarios, "cuando nel Intercélticu del 2008 nun permitió esi tipu de gastos".
  
Asina, según les cuentes que fixo la popular "cada voluntariu recibió 413 euros, llibres d'impuestos, por un trabayu de diez díes". "Supongo que pal próximu Beltaine va haber una gran cola colos 7.000 paraos del conceyu esperando pa facese con esi trabayu". Criticó tamién la "escasa claridá" de les cuentes presentaes por Xuntanza, entidá na que s'axunten delles asociaciones llocales y qu'entamaron el Beltaine, y a les que dende'l Conceyu "nun se punxeron reparos".
  
Al respeuto de les actuaciones musicales, indicó que tres formaciones de Xuntanza facturaron cinco actuaciones, poles que cobraron un total de 8.816 euros. "La Banda de Gaites d'Avilés, a la que pertenez el conceyal Fernando Díaz Rañón, realizó trés actuaciones, poles que se llevantó más de 5.000 euros".
  
Amás, la conceyala recordó que la entidá tien robláu col Conceyu un conveniu pol que recibió más de 9.000 euros al añu, lo que significa que "nel 2009 cobró cerca de 15.000 euros del Conceyu d'Avilés, muncho más que cualquier de banda d'esti tipu que percuerra Asturies tocando".
  
A la vista d'estos datos Carmen Vega pregúntase "qué va faer el conceyal de Cultura, cuando dende'l Gobiernu nacional se pida que los conceyos seyan más austeros". Amás, recordó qu'Esbardu yá nun tien deudes cola SGAE, polo qu'entiende que "lo normal sería volver al festival orixinal y olvidase del gastu faraónicu del Beltaine"