Xurde Blanco: “Queríen valtar la Llei, salió-yos el tiru per detrás”

|

“L'actitú del Principáu foi la d'afalar al xuez pa que plantegase la custión d'inconstitucionalidá, trabayó pa valtiar la Llei d'Usu, pero salio-y el tiru per detrás”, camienta Xurde Blanco.

El Lletráu del Serviciu Xurídicu del Principáu d'Asturies y Secretariu de Xuristes pol Asturianu, vien de ver como’l Tribunal Constitucional acaba de reconocer la constitucionalidá de la Llei d’Usu plantegada pol Xulgáu de los Contencioso Alministrativo númberu 3 d'Uviéu. La impugnación llegó tres qu’él plantegara un recursu contra una resolución que-y refugaba la solicitú d'un permisu llaboral por tar redactada n'asturianu.
 
Según declaraciones recoyíes por Asturies.com, l’abogáu camienta que l'Alministración Autonómica “quería furtar el mínimu drechu que ye'l del emplegu de la llingua propia queriendo imponemos l'usu obligatoriu del castellán”. Pero afita que con esti autu del Constitucional yá nun hai dubia dala: “cualquier ciudadanu pue empobinase a l'Alministración del Principáu n'asturianu, de pallabra o per escritu y, ensin distinción dala tien que lu tramitar”.
 
L'autu del Constitucional avala l'usu del asturianu per parte de los ciudadanos en cualesquier documentu oficial nes sos rellaciones cola Alministración autonómica. Sicasí, Xurde Blanco esplica qu’esti autu nun entra a valorar el conteníu del artículu 8 de la Llei d'Usu (Los Ayuntamientos asturianos van poder adoptar les midíes necesaries p'asegurar la efectividá del exerciciu de los drechos llingüísticos qu'esta Llei otorga a los ciudadanos residentes n'Asturies), y que l’autu cinca namás a l'Alministración Autonómica de forma direuta, “non ye una cuestión qu’afeute a la rellación de los ciudadanos colos Ayuntamientos”.
 
Con too, per otres razones que nun se plantegaron nesti pleitu, Xurde Blanco entiende que la mesma obligación del Gobiernu d’aceptar l’asturianu, tienla la Universidá d'Uviéu, “que tien pleitu pendiente”, los conceyos, “artículu 8 de la la Llei d'Usu y 7.1.d. de la Carta Europea de les Llingües Rexonales o Minoritaries”, y l'Alministración del Estáu asitiada n'Asturies, “mentáu artículu de la Carta y los principios de los actos propios y de la seguranza xurídica”.

La llei recueye l'ámbitu d'aplicación o'l fechu de que'l preceptu llegal nun atribuye a los ciudadanos el drechu a escoyer la llingua del procedimientu. Esto supón, según esplica’l lletráu que nuna Comunidá Autónoma con oficialidá de la so llingua propia, “por exemplu Cataluña”, el ciudadanu qu'entama un procedimientu alministrativu escueye la llingua oficial na que quier que se sigan tolos trámites y l'Alministración tien que respetar la escoyeta. “Asina, si escueye'l catalán, l'Alministración ta obligada a contestar en catalán y a facer tolos trámites, mesmamente los internos, na llingua seleccionada”, esclaria’l lletráu.
 
“Por contra, cola nuesa Llei d'Usu, l'únicu drechu que tenemos los ciudadanos ye'l d'empobinamos a l'Alministración n'asturianu, pero ésta va emplegar el castellán o'l billingüismu nes sos actuaciones y resoluciones porque la llingua del procedimientu ye siempres el castellán”, apunta’l Secretariu de Xuristes pol Asturianu.
 
El Constitucional afita la constitucionalidá de la Llei d'Usu
Consuelo Vega ve positivu l’aval constitucional de la Llei d’Usu

Comentarios

Gracies Xurde Blanco.
Esi ye'l camín. Caún ha facelu na so estaya o profesión onde ye más útil.

 Gracies fonderes Xurde!

Munches gracies Xurde, y a tolos demás, yá sabeis, yá sabemos. TRABAYAR, TRABAYAR Y TRABAYAR. Tamos entamando a recoyer de lo semao.

Gabis

Contador Estadistiques