Ecoloxistes carguen contra'l decretu d'ayudes al carbón

Ecoloxistes n'Acción cargó contra'l real decretu que regula'l mecanismu pa incentivar el consumu de carbón nacional poles eléctriques, yá que'l testu "ta basáu en supuestos falsos".

Según señaló Ecoloxistes n'Acción, l'oxetivu principal de la midida, según la so esposición de motivos, ye asegurar la garantía de suministru a los consumidores eléctricos. Sicasí, recordaron que, como sostién la Comisión Nacional de la Competencia, CNC, "nun paez qu'a cortu plazu esta garantía de suministru tea en peligru puesto que la potencia instalada nel parque xenerador peninsular queda a 31 d'avientu de 2008 en 90.878 megavatios, mientres que la máxima demanda de potencia horaria foi de 42.961 megavatios".

Esplicaron que l'informe de la CNC plantega que "la necesidá de la midida, con arreglu a los oxetivos qu'establez el mesmu RD, ye bien cuestionable, por culpa de que nin esiste una situación de crisis enerxética que faiga necesaria la movilización d'estos recursos, nin pon en peligru'l suministru d'eletricidá nin el suministru de carbón a les centrales eléctriques qu'utilicen esta fonte d'enerxía, nin, a lo último, el parque xenerador de centrales de carbón ta en peligru de desapaición nel cortu plazu".
  
Amás, consideren que'l Real Decretu supón una contradicción col principiu rector de la Llei del Sector Eléctricu, y supón una distorsión significativa de los procesos de funcionamientu de los mercaos.
  
Dende'l puntu de vista ambiental, los ecoloxistes sostienen que siguir apostando por fontes d'enerxía fósil, qu'afecten al funcionamientu del sistema, perxudicando la entrada de fontes renovables, de la que, al encarecer el sistema baxen los recursos económicos disponibles pa les enerxíes renovables.
  
A lo último, nun descartaron que la instauración d'esti procedimientu de resolución de restricciones por garantía de suministru nun constituya una ayuda d'Estáu, polo qu'ha procedese a la notificación d'esta midida a la Comisión Europea.