UNA propón un compromisu cola cultura y el so enseñu

UNA va aldericar nel so congresu sobre l'estáu de la industria cultural, amosando una crítica contra “la so morfoloxía actual en manes de la política y el diseñu cultural del PSOE”.

Dientro de la so ponencia marcu pal II Congresu, que va tener que llugar esti fin de selmana nel Auditoriu d’Uviéu, UNA combina l'análisis con un conxuntu de propuestes destinaes a la preservación del patrimoniu cultural asina como a la so actualización y usu normal y una crítica a la política cultural del PSOE.
 
Según el voceru de la estaya de cultura, Inaciu Llope, “l'estáu de desnortiamientu” de la política cultural nun apara no tradicional; “les enseñances artístiques y la situación d'abandonu de la comunidá artística son exemplu más claru de la desidia y la incapacidá d'esa alministración”. Indicando que paez que les escueles d'arte tán ehí, “namás que porque tienen que tar, pero absolutamente abandonaes".
 
Inaciu Llope considera qu'el " mesmu abandonu que podemos ver n'Asturies nel patrimoniu cultural, hailu tamién na enseñanza de les artes y na cultura en xeneral, a que se mira perbaxo de los exemplos más propagandísticos como la Llaboral".
 
Pa Llope, l’únicu proyeutu del Principáu ye “un país onde la identidá nun va más allá d'unes piedres y unos regatos y tolo demás queda fuera del campu de visión, como si nun esistiera, buscando descaradamente'l so desaniciu".
 
El casu de la Llingua Asturiana tien un apartáu específicu na ponencia, nel que se defende la so reconocencia llegal al traviés de la oficialidá, y la so tresmisión xeneracional garantizada pola so enseñanza y por una presencia tresversal nos medios de comunicación.
 
Según la ponencia marcu d'UNA, "ye necesaria una política cultural global, con una idea moderna y de país, daqué que'l PSOE nin quier nin pue, nin sabe facer, pa contribuyir al desallancamientu de la industria cultural d'Asturies llevándola per un camín onde se xunten lo tradicional y lo contemporáneo d'una manera harmónica y arriquecedora".