Feijóo asegura que nun cree na inmersión llingüística total

Feijóo dixo que nun cree na inmersión total nin en castellán, nin en gallegu, "amás de ser económica, presupuestaria y financieramente imposible, ye llinguisticamente invidable".

El presidente de la Xunta defendió la idea d'un "billingüismu cordial nes aules que favoreza'l caltenimientu de la bayura que supón la conocencia de dos llingües".
 
Feijóo aseguró, en declaraciones a Onda Cero recoyíes por Europa Press, que yá criticó en delles ocasiones la inmersión llingüística que se da n'otres Comunidaes Autónomes y que, poro, nun la quier pa Galicia. "Nun creo na inmersión en gallegu nin na inmersión en castellán, y como nun lo creo, nun lo vamos plantegar", dixo'l líder del PP gallegu, cuestionáu pola fidelidá con que'l partíu sigue'l programa eleutoral presentáu a les eleiciones.
  
"Ye cierto qu'hai alguna asociación qu'entiende que tien d'haber una total llibertá pa que los fíos estudien toles asignatures en castellán o toes en gallegu, pero eso sería invidable na Comunidá española con más núcleos de población, casi 29.000, onde resultaría imposible desdoblar les aules para faer esa seleición", comentó.
  
Amás, Feijóo mostróse seguru de que'l sentimientu mayoritariu de los gallegos ye llegar a "un billingüismu cordial, puesto que en Galicia'l 99,9% de la población entiende perfectamente'l gallegu". La mayoría de los padres, encuestaos pola Xunta, piensen qu'han conocese les dos llingües na enseñanza en Galicia
  
Por eso, "ye muncho más relevante", a xuiciu del presidente de la Xunta, "llograr restaurar el drechu de los alumnos pa poder dirixise al profesor de forma oral y escrita, en clase, en cualquier de los dos idiomes oficiales de Galicia".