El coordinador d'Izquierda Xunida y diputáu na Xunta Xeneral del Principáu, Jesús Iglesias, consideró güei cumplíos los oxetivos en política llingüística del pautu de Gobiernu.

En rueda de prensa xunto col presidente asturianu, Vicente Álvarez Areces, y el secretariu xeneral de la FSA, Javier Fernández, Iglesias señaló la creación de servicios de normalización llingüística en dellos conceyos asturianos como ún de les importantes meyores en materia llingüístico, amás de la collaboración institucional cola Academia de la Llingua Asturiana.
  
"La política d'articulación d'oficines de normalización nos conceyos, y l'apoyu dende'l Gobiernu, anque tovía entendemos que pue dir abondo más allá, significó una meyora importante", señaló, preguntáu polos periodistes. De siguío, apuntó la collaboración institucional cola Academia.
  
Dende la entrada d'IX-BA-Verdes nel Gobiernu autonómicu, creáronse cinco nuevos servicios de normalización llingüística: Llaviana, Piloña, Casa de la Llingua de Corvera, Oficina d'Actividaes Culturales y Llingüístiques de Navia y Ozcos-Eo. Súmense a los otros diez que yá esistíen nos conceyos y mancomunidaes de Xixón, Llangréu, Ḷḷena, Comarca de la Sidra, Cabo Peñes, Siero, Samartín del Rei Aurelio, Cangas del Narcea, Mieres y Avilés.
  
Per otru llau, comentó que la so formación tuvo conocencia la esistencia d'un informe de la subsecretaría del Ministeriu d'Educación sobre la situación de los profesionales de la enseñanza de Llingua Asturiana, sicasí afirmó nun conocer el conteníu del documentu y tar a la espera de recibilu.