Más de 20 delegaciones participarán nel II Congresu d'UNA

Nel pieslle del congresu participarán organizaciones asturianes como Bloque por Asturies, Partíu Asturianista o Los Verdes d'Asturies, y foriates como Chunta Aragonesista y Aralar.

El Comité Organizador del II Congresu d'Unidá Nacionalista Asturiana (UNA) que se fai esti fin de selmana nel Auditoriu d'Uviéu, comunicó güei que nesti momentu hai confirmada la participación de más de 20 delegaciones que van asistir al actu de pieslle. L'alderique de les ponencies política y d'estatutos tendrán llugar na xornada del sábadu, y el domingu fadrase l'actu de pieslle nel que van participar los convidaos y va presentase la nueva Xunta Executiva d'UNA.

Ente les delegaciones que yá confirmaren la so presencia nel Congresu alcuéntrense partíos políticos asturianos como Bloque por Asturies, PAS y Los Verdes d'Asturies. Mientres que de fuera del país tarán la formación vasca Aralar y l'aragonesa Chunta Aragonesista.

Nel congresu van tar presentes el diputáu de la Xunta Xeneral Roberto Colunga, en representación del Bloque, y el parlamentariu vascu Mikel Basabe, en representación d'Aralar. Tamién asistirán agrupaciones polítiques locales como ApN (Nava) y UICA (Carreño).
 
Amás de los partíos políticos, instituciones como l'Academia de la Llingua Asturiana y el Conseyu de la Mocedá del Principáu d'Asturies (CMPA) y la Xunta pola Defensa de la Llingua Asturiana confirmaren yá la so presencia, igual que lo fixeron otres organizaciones y coleutivos de distinta mena como l'Asociación de Colectivos Asturianos (ACA), Belenos, Fai! o Xeira. Pela so parte, el campu sindical va tar representáu por SUATEA y CSI, que van unviar delegaciones propies. Según el Comité Organizador del Congresu hasta'l entamu de la xornada espérense nueves confirmaciones.
 
Política municipal, segundu pegoyu
 
UNA propón nel so II Congresu a los conceyos como "principal pegollu organizativu" del nacionalismu depués del “Espaciu Políticu Asturianu”, calificando la política municipal como un "ámbitu de presencia imprescindible pa existir a nivel de la conciencia de la xente, lo que ye cuasi lo mesmo qu’existir políticamente "

Según el Secretariu d'Organización d'UNA, Roberto Holgado, la definición de la política municipal ye la llinia estratéxica más importante de la ponencia política del II Congresu, depués de la propuesta de creación del Espaciu Políticu Asturianu na que s'inxerta, porque "si’l nacionalismu nun ye quien a presentase como una alternativa homologable y normal nos conceyos,  mal va existir como opción a otros niveles”.
 
L'ámbitu municipal propónse na ponencia d'UNA, según Holgado, "como'l principal pegollu organizativu pa demostrar la viabilidá del proyeutu nacionalista y al mesmu tiempu pa contribuir localmente al avance global d’UNA y del Espaciu Políticu Asturianu". Afitando que los conceyos son “célules d’una vertebración comarcal y territorial diferente del país, non disgregadora y afayada a les necesidaes llexítimes de les comunidaes”.
 
Na ponencia marcu del II Congresu, que tendrá que ser aprobada pola militancia, especifícase tamién que, siempre dientro del proyectu de país y de los conteníos políticos y los métodos xenerales, "cada conceyu tien una dinámica propia que solo pue tener respuesta con autonomía local, polo qu'en cada conceyu UNA estudiará la estratexa concreta a siguir y les polítiques d'aliances que seyan necesaries pa sacar alantre la nuesa llinia estratéxica, la nuesa política y el nuesu programa".