El xuez confirma la multa por nun rotular en catalán

El Xulgáu refugó'l recursu que presentó Manel Nevot, dueñu de Finques Nevot de Vilanova i la Geltrú, a la multa que-y impunxo nel 2007 por nun tener la rotulación en catalán.

L'Axencia Catalana de Consumu, que depende de la Generalitat catalana, multó a Nevot con 400 euros por nun rotular en catalán, tal como establez la Llei 1/1998, y con 400 euros más por nun tener les obligaes fueyes de reclamación. Ésti decidió recurrir ambes sanciones argumentando que yeren inxustes, dao que'l so local disponía de carteles n'ambes llingües, anque l'esterior taba namás en castellán -'FINCAS NEVOT API, Compra, Vienta, Pisos, Solares, Rústiques'- y plantegó delles cuestiones d'inconstitucionalidá.
  
Nel xuiciu, celebráu'l pasáu 4 de febreru, la defensa de Nevot aseguró que la Llei de Política Llingüística "ye coercitiva col castellán y supón un claru atropellu de la llibertá d'espresión". Una acusación a la que'l Govern catalán respondió asegurando que la so actuación "lléndase a prever l'usu del catalán p'atender a los drechos llingüísticos de los consumidores de Cataluña, pero aceptando dafechu'l plurilingüismo", según consta na sentencia.
  
Sicasí, agora'l xuez resuelve que nun se trata d'una imposición d'un idioma con esclusión d'otru, sinón a cencielles d'una regulación de mínimos, dao que la esixencia de la redacción polo menos en catalán, según reza l'artículu 32 de la Llei 1/1998, y en consecuencia'l deber d'usu del mesmu que d'él se deriva, nun ye de nenguna manera contrariu al artículu 3 de la CE y por tanto a la previsión que del castellán fai'l mesmu por razón de ser la llingua oficial de tol Estáu.
  
"Ye perfectamente compatible con una regulación autonómica que la so finalidá ye garantizar l'abonda conocencia y l'usu del catalán, que ye lo que'l preceptu a última hora pretende", recueye na sentencia.
  
El maxistráu tampoco cree, como apuntaba Nevot, que s'incumplieren los artículos 10 y 20 de la Constitución, y la so llibertá d'espresión y drechos fundamentales. El xuez considera que nun se torga l'usu del castellán, sinón sólo tien que tar el catalán nos establecimientos comerciales.
  
Nel so recursu, Nevot tamién consideró frayáu l'artículu 14 de la Constitución, al constatar que la obligación de rotular polo menos en catalán, non yá nun protexe a los usuarios sinón que los perxudica por "facer posible que se prescinda del castellán, lo que cree que resulta discriminatoriu al principiu d'igualdá al protexer namás a los catalanes y non a tolos españoles".
  
Na sentencia, el xuez nun considera que l'artículu 32 de la Llei 1/1998 seya contrariu a derechos d'igualdá. "Nun cabe entender que'l preceptu cuestionáu seya contrariu a esti derechu, puesto que la Constitución reconoz que nel artículu 14, el redactáu de los rétulos polo menos en catalán, lo qu'a última hora intenta ye promover les condiciones d'igualdá d'ambos idiomes", asegura.
  
El maxistráu tampoco almite l'argumentu de Nevot que cuestionaba la so llibertá d'empresa. Coles mesmes, el xuez echa de menos nel recursu de Nevot más alusiones esplícites que retruquen la multa en concreto por nun retular en catalán, más allá de toles cuestiones de constitucionalidó qu'utilizó.
  
El dueñu de la inmobiliaria tamién reclamó qu'hubiera un error na apreciación de los fechos, puesto que na fachada del llocal, amás del rótulu en castellán, taba un rótulu en catalán, grabáu nel cristal, que dicía 'Finques Nevot' y apurrió una fotografía.
  
Según el xuez, que tuviere esti grabáu, "nun cumple cola esixencia de facer constar el nome, pero tamién l'actividá y los servicios polo xeneral qu'empresta'l comerciu, lo que sí informaba'l que taba namás en castellán".
  
"Distinto yera, como asocede en munchos otros establecimientos, si indéntica información dada n'idioma castellán, inglés, y hasta chinu por citar exemplos, apaeciere tamién reflexada en catalán", acaba.