Piloña convoca'l Concursu de Narraciones Curties n'Asturianu

Piloña convoca'l III Concursu de Narraciones Curties n'Asturianu 'Conceyu de Piloña', col que quier contribuir a la normalización llingüística y a la promoción del conceyu.

Según informó'l Conceyu, el concursu, patrocináu pola Conseyería de Cultura del Principáu, la Caxa Rural y el periódicu 'El Fielato', tien les mires de potenciar la imaxinación y la creatividá de los ciudadanos, recuperar la sensibilidá pola llingua materna y espublizar relatos asturianos, de corte modernu o tradicional y ta abiertu a toles persones que quieran participar. 

Los trabayos presentaos van tener que tener ente tres y cinco folios, que tendrán de presentase na Casa de Cultura de L'Infiestu, antes del 12 de xunu en dos sobres zarraos. Nún tien de constar el trabayu por triplicao, y nel otru los datos del autor y un númberu de teléfonu de contactu.
  
El fallu del xuráu va dase a conocer los primeros díes del mes de xunetu y la entrega del premiu va facese'l 16 de xunetu, na Casa de Cultura de L'Infiestu, a les 20.00 hores. El primer premiu ta dotáu con 1.000 euros y el segundu con 700 euros.