Los partíos gallegos contra Rosa Díez

Los tres partíos con representación nel Parllamentu de Galicia, BNG, PP y PSOE, tán alcordando una condena institucional de les declaraciones de Rosa Díaz sobre Zapatero.

“Zapatero ye gallegu nel sentíu más peyorativu del términu”, foren les pallabres de la líder d’UPyD nuna entrevista con Inaki Gabilondo pa CNN+.
 
Anque tovía nun ta clara la fórmula que van adoptar, nacionalistes, conservadores y socialistes van xuntar les sos fuercies pa condenar a la líder de la llucha contra los nacionalismos que nun vienen de Madrid y contra les llingües del Estáu que nun son el castellán.
 
Más significativu ye tovía, cuando’l PP del país vecín ta movilizando al galleguismu, col sofitu de los socialistes, na defensa del idioma propiu y contra los retrocesos en política llingüística que quieren impulsar dende l’executivu autonómicu.
 
Bieito Lobeira llanzó la propuesta'l pasáu llunes en nome del Bloque y los voceros de los tres grupos coincidieron en censurar de forma oficial les pallabres de Rosa Díez, bien con una declaración institucional del Parllamentu, bien al traviés d'otres víes, como una proposición non de llei.