Greenpeace pide al Principáu que refugue la incineradora

Greenpeace exixó coherencia al Principáu na so política de xestión de residuos, porque, a pesar de qu'aceptar la propuesta d'IU, "sigue presionando pa que salga alantre la incinerdaora".

Énte la proposición non de llei d’IU-BA sobre la ellaboración d'un nuevu programa de xestión de borrafes, la FSA amosó la so disposición a apautar una llei qu'aumente toles midíes complementaries como'l reciclaxe y compostaxe, pero reafirmándose na necesidá de la incineración.
 
Greenpeace recordó qu'existen alternatives a estes instalaciones polo que pide responsabilidá a la FSA y que tengan en cuenta la salú y el mediu ambiente de los asturianos, a la vez qu'exixe un cambiu de política pa fomentar de verdá la reducción, reutilización y reciclaxe de los residuos.
  
"Esperamos qu'IU nun se dexe engañar polos cantos de sirena de los socialistes asturianos y nun ceda a les sos presiones, y que se caltengan firmes na so oposición a la construcción d'una incineradora en Serín", declaró'l responsable de la Campaña de Contaminación de Greenpeace, Julio Barea.
  
La organización ecoloxista pide una moratoria na construcción de la incineradora y que se ponga en marcha polítiques de xestión y recoyida de residuos más sostenibles, como les que yá tán funcionando n'otros llugares. Ye'l casu, según el coleutivu, de la recoyida puerta a puerta que desarrollen decenes de conceyos catalanes y vascos. Con estos sistemes algámense niveles de recuperación y reciclaxe que superen el 80%, amás de reducir los costes y tases que deben pagar los ciudadanos.
  
Según Greenpeace, quemar residuos ye'l sistema de xestión más caru: por cada tonelada incinerada les alministraciones deben pagar 60 euros a la empresa que xestiona la planta. La construcción del proyectu de Serín supondrá, pues, un fuerte incrementu na tasa de basura que paguen los asturianos y, teniendo en cuenta que los cosntratos coles incineradores son d'ente 25 y 30 años, bloquiaráse demientres décades l'aplicación de polítiques sostenibles de residuos.
 
Ecoloxistes n’Aición quier l’amenorgamientu de borrafes
 
Dende Ecoloxistes n´Aición repiten la oposición a la incineradora y destaquen la necesidá d'incluyir dientro de la normativa que propón IU, el necesariu amenorgamientu de borrafes “yá que consideramos qu'esa ye la primer de les midíes a desenvolver previes a la reutilización y el reciclaxe”.