LA SGAE muestra'l so deséu d'entendimientu

La SGAE anunció'l so deséu d'entendimientu coles asociaciones asturianes y la so intención d'analizar la documentación apurrida güei por asociaciones de Villaviciosa.

La SGAE reclamaba cerca de 30.000 euros en conceutu de drechos d'autor, y citara a les asociaciones a un actu de conciliación esta mañana. La Sociedá va estudiar lo espuesto polos tres coleutivos, que planteguen unes cifres considerablemente inferiores a les pidíes pola entidá xestora.
 
Nel actu celebráu esta mañana nos Xulgaos de Villaviciosa, representantes de l'Asociación Boides (organizadora del festival Pueyes Rock), de la Sociedad Villaviciosina de Festejos (Sovife, organizadora de les fiestes de El Portal) y la Comisión La Pilarica (organizadora de les fiestes de Poreñu) apurrieron a la Procuradora la documentación na que se recalculaba la deuda contrayida con Autores.
  
La reclamación referente a les fiestes d'El Portal correspuende a los años 2007 y 2008, y suma 13.749 euros, que tendría d'abonar la Sociedad Villaviciosina de Festexos (Sovife). La de Pueyes ye la de mayor cuantía, cifrada en 14.326 euros, poles ediciones 2005, 2006, 2007 y 2008 del festival, entamáu pola Asociación Cultural Boides. A lo último, el pidimientu sobre les fiestes de Poreñu refierse al 2008 y ye de 1.478 euros.
  
En nengún de los casu, los organizadores acepten la cifra plantegada de la Sociedá Xestora. Los responsables de Sovife calcularon una deuda que rondaría los 5.000 euros. Pela so parte, l'Asociación Boides calcula unos 1.000 euros. A lo último, la Comisión de Festexos de Poreñu, en collaboración cola Confederación de Federaciones d'Asociaciones de Vecinos de Villaviciosa (Cavastur), echó unes cuentes que sumaríen 58,09 euros. El mesmu va incluyir los porcentaxes aplicaos a la orquesta qu'actuó nes folixes y al pasacais d'un gaiteru y un tamboritero.
  
Nun comunicáu, la Sociedá anunció" que va analizar agora la estensa documentación apurrida nos distintos casos y, calculaos los derechos d'autor, va comunicáse-yos esta nueva información a les respectives partes". Sicasí, el testu calcó en que "la reclamación xudicial ye l'última de los recursos del que fai usu esta entidá, que procura'l beneficiu armoniosu de los sos socios y los usuarios del so repertoriu".