El xuez norirlandés decreta la estradición de De Juana

El xuez norirlandés que preside'l procesu d'estradición de Juana Chaos falló a favor de la so entrega a España pa responder d'un supuestu delitu d'allabancies al terrorismu.

Na quinta vista dende que'l procesu entamare en payares del 2008 cola entrega voluntaria de De Juana antes les autoridaes del Ulster, Tom Burgess presentó la sentencia na qu'accede a la reclamación del maxistráu Eloy Velasco, que considera que la frase 'Aurrera bolie' (Alantre la pelota), lleida supuestamente en nome de De Juana n'agostu del 2008 nun actu d'homenaxe en San Sebastián, representa una ofensa d'allabancies del terrorismu.
  
Na so interpretación, la frase invocaría'l lema que'l fináu dirixente etarra Domingo Iturbe 'Txomin' emplegaba p'apelar al caltenimientu de la llucha armada pa llograr la independencia del País Vascu. Pal xuez del Ulster, l'acusación sería considerada delitu en virtú de la Llei Antiterrorista británica, de pronunciase en Reinu Uníu.
  
Burgess confirma d'esta manera'l criteriu espresáu hai yá un añu, cuando considerare la imputación susceptible d'estradición. Sicasí, pa evitar la entrega a España, la Defensa alegara l'estrés que sufre l'ex presu de resultes de los malos tratos sufríos nos sos 21 años na cárcel, 18 d'ellos correspondientes a los 3.000 a los que lu condenaren por 25 asesinatos mientres la so pertenencia a la banda.
  
Nesti sen, alvirtió de que, si lu estraditen, De Juana podría volver ponese en fuelga de fame, con riesgu de muerte, como yá procediere cuando lu acusaren por artículos consideraos amenazantes. Na última vista, celebrada en payares, un psiquiatra británicu convocáu pol so equipu llegal declaró que l'ex presu sufre estrés post-traumáticu, depresión y agotamientu.
  
El xuez Tom Burgess vino estudiando estes alegaciones dende payares, pero a lo último amparó la demanda de l'Audiencia Nacional. Arriendes d'ello, ábrese agora un procesu de recursos que va entamar na Corte d'Apelaciones del Altu Tribunal (High Court) de Belfast. D'atopase con una nueva negativa, De Juana treslladaría'l casu hasta la Corte Suprema británica, yá en Londres.
  
Juan Ignacio de Juana Chaos compareció esti llunes nel complexu xudicial de Laganside, en Belfast (Irlanda del Norte), pa conocer la sentencia definitiva sobre la so estradición a España, 16 meses dempués de que'l procesu entamare de magar la so entrega voluntaria na capital del Ulster, onde vive dende'l branu del 2008. L'ex presu d'ETA presentóse colos sos abogaos y la so compañera, Irate Aranzabal, y llevaba una camiseta na que se lleía'l mensaxe ¿ónde Jon?, n'eusquera, en referencia al miembru d'ETA desapaecíu Jon Antza.