Avilés ye la comarca más contaminada d'Asturies

El Coleutivu Ecoloxista d'Avilés asegura que, según datos facilitaos pol Serviciu de calidá del Aire, la comarca tien el peor aire del país, qu'a la so vez, ye de los peores aires d'España.

Coles mesmes, el Coleutivu señaló que, mentanto, los Conceyos de la comarca amenorguen la gravedá de los datos oficiales, que representen que "tolos díes del añu se recueyen datos qu'aseguren que l'aire ye de mala calidá, y non con carácter eventual como aseguren".  

"La comarca avilesina rexistra una elevada tasa d'enfermos respiratorios, cardiovasculares y tumorales", según el Coleutivu Ecoloxista. Poro piensen que "nun tien sen algún apoyar instalaciones que nun xeneren empléu, que nun creen valor añadíu y solo dexen la contaminación".
  
Al respeuto, el Coleutivu pide a los Conceyos que "asuman les sos responsabilidaes y trabayen pa que se reduzan estos niveles de contaminantes producíos pola industria y el tráficu escesivu".