La Coordinadora diz qu'incinerar ye más qu’un tema económicu

La Coordinadora Ecoloxista señala qu'instalar la incineradora ye mas qu'un tema económicu, “ye un tema de salú, d'emplegu, de sostenibilidá y calidá de vida”.

Recuerden que los socialistes, tán oponiéndose a les incineradores n'otros llugares d'España, “y nun son sospechosos de ser talibanes ecoloxistes como nos llama a nós, demostrando una vegada más la so capacidá pa la crítica”. Según la Coordinadora, nel PSOE del restu d'España aseguren qu’esti tipu d'instalaciones xenera una gran cantidá de problemes medioambientales.
 
Los ecoloxistes esclarien que según estudios científicos sobro la materia, les incineradores emanen dioxines y partícules contaminantes a l'atmósfera que pueden afeutar a la salú, “pero equí resulta que la mesma incineradora contamina como un cigarru, ensin concretar el tamañu del cigarru y de los pulmones del que lo fuma”.
 
Más allá de los criterios ambientales, afirmen, esiste un riesgu comprobáu sobre la salú de les persones que viven al rodiu d’incineradores. Apunten que dellos estudios señalen la incineración como la principal productora de compuestos contaminantes orgánicos persistentes.
 
Señalen que les emisiones de CO2 nun van baxar de 600.000 tonelaes al añu, “cuatro vegaes más qu'agora, pero nun pasa nada, yá nos dixo la responsable d'In-Sostenibilidá del Principáu qu'eses emisiones nun se van computar”.
 
Los ecoloxistes dicen que quieren poner una incineradora pa quemar 450.000 tonelaes/añu de borrafes doméstiques, “cuando según datos de Coxersa l'añu 2009 lleváronse al vertederu 434.629 tonelaes”. Lo que pa los ecoloxistes evidencia que van quemar toles borrafes doméstiques ya industriales, ensin posibilidá de reciclaxe, “porque si se separa, la incineradora consumiría enerxía en cuenta de producila pa quemar”.
 
Apunten que se va precisar un nuevu vertederu más peligrosu. “La incineración xenera por tonelada de 250 a 350 quilogramos d'escoria y povises altamente peligrosos qu'esixen un tratamientu como lo que son, borrafes tóxiques, encareciendo y aumentando la peligrosidá de los vertederos de destín, qu'inda nun nos dicen onde van dir”, afiten.
 
Amás, señalen que se va destruir emplegu al nun contratar xente pa reciclaxe, yá que califiquen la xestión eficiente de les basures como un xacimientu d'emplegu, “si se lleva too a quemar, sobren 12 persones pa tola planta”. Tamién, amuesen la so esmolición pol dineru que-y va costar la incineradora y la so repercusión nel bolsu de los asturianos.
 
Pa finar, indiquen que'lconseyeru d’Infraestructures, Mediu Ambiente y Ordenación del Territoriu, Francisco González Buendía, ye responsable de la mala xestión del mediu ambiente asturianu, “tamién de la xestión final de les borrafes doméstiques, anque delegaran estes decisiones nel xerente d'una empresa”.