Teatru y música pal fin de selmana

Fin de selmana enllenu d’actividá cultural a lo llargo de tol país. N’Asturies.com facemos una esbilla de lo más interesantes.

La primer cita ye en Samartín del Rei Aurelio, onde Ambigú Media pon n’escena “Poison”, una comedia negra protagonizada por Pedro Durán, el popular Petiso de la TPA. La cita ye a les 16.30 nel Teatru de L’Entregu. Les artes esceniques siguen na Plaza de L’Haba de Llanera, onde Teatro Margen presenta la so versión del testu de Molière “Tartufu”, con dramaturxa d'Arturo Castro contando pa ello cola puesta n'escena de la película que fexera Murnau sobre'l clásicu. La cita ye a les 20.00 hores.
 
Mientres que la meyor música tradicional, llega a La Felguera de la mano del gaiteru gallegu Anxo Lorenzo, qu’ufre clara amuesa d'un nuevu conceptu de músicu que nunca nun ve barreres cuando esperimenta cola música tradicional y cola contemporánea y que tamién tien l’habilidá d’amestales suavemente pa convertir esta xunión en nuevos ritmos y melodíes vibrantes y fresques. El músicu gallegu va tar acompangáu pa la ocasión pola so banda habitual, con Xosé Liz al bouzuki y la guitarra; Begoña Riobó al violín; Álvaro Iglesias al contrabaxu y Roberto Milla al bodhram. La cita ye a les 20.15 nel Teatru Nuevu de La Felguera.
 
A les 21.00 hores, nel Café DAM de Xixón, tamién vamos poder sentir a MV & EE, un brillante duu qu'amiesta sabiamente lo meyor del folk más ácidu col rock psicodélicu y esperimental de los 60/70. Xunta ellos tará'l proyectu en solitario del belga Paul Labrecque, miembru del colectivu Sunburned Hand Of The Man que crea paisaxes psicodélicos cola so guitarra, banjo y voz. Hai xente que lu describe como un cruce ente Daniel Higgs y Doc Boggs.
 
Yá en domigu, el Teatru de L’Entregu, acueye a partir de les 18.30 hores, un conciertu solidariu con Haití, que cuntará coles actuaciones de Vicente Díaz, Los Stukas, El Coru San Andrés, La Coral San Martín, El Coru del Conservatoriu Valle del Nalón, el Grupu de Teatru Refaxu ,de Blimea, y un grupu de destacaos cantantes de tonada xunta los grupos Cepedal & C.I.A , el Grupo de Folk Duerna y la Bandina de Gaites Tradicional Valle del Nalón.
 
Esi mesmu día, nel Teatru Filarmónica d’Uviéu, vamos poder a partir de les 20.15, la obra “Un cadáver a las cinco”, de la mano de Teatro Electra. Nella, cuéntase como Jessica ta llocamente namorada de Walter, el so preparador físicu. Amaña un alcuentru románticu col envís de conquistalu, pero cuando tán tomando una copa, Walter cai al suelu, dase cola mesa y, espurre la pata. Colos nervios a flor de piel Jessica dase cuenta de que ta muertu y nun sabe que facer…
 
Más actividaes n'axenda d'Asturiactiva