El 19,4% de los catalanes taría a favor de la independencia,  un 29,5% defendería un estáu federal y un 38,2% taría d'acuerdu col actual marcu autonómicu.

Son datos del barómetru d'iviernu del Centru d'Estudios d'Opinión (CEO) de la Generalitat, nel que participaron 2.000 encuestaos.
  
Según los datos, la mayoría de los entruguaos (38,2%) defenden l'actual modelu autonómicu. Al 29,5% gustaría-yos una España federal, y al 19,4%, la independencia. Per otra parte, el 59% de los encuestaos creen que Catalunya consiguió un nivel insuficiente d'autogobiernu.
  
Sobre'l sentimientu de pertinencia, el 45,1% de los encuestaos dicen sentise tan catalanes como españoles. Siéntense más catalanes qu'españoles el 25,4%, y solo catalanes, el 17,3%.
  
La encuesta fízose a 2.000 catalanes mayores de 18 años ente'l 13 y el 28 de xineru, y tien un marxe d'erru del 2,74%.
 
Paru y precariedá
  
El paru y la precariedá llaboral son el principal problema pa un 56% de los encuestaos. En segunda posición, y a una enorme distancia, figura'l funcionamientu de la economía, col 11,8% de les respuestes, y en tercera, la insatisfacción cola policía, col 9,1%. De siguío, figuren la inmigración (7,4%), les relaciones ente Catalunya y España (4,1%) y la meyora de les polítiques sociales (2%).
  
Al preguntar sobre qué partíu solucionaría meyor el principal problema de Cataluña, el 42,3% de los encuestaos dicen que nengún, el 19,3% nun lo sabe, el 14,9% cita a CiU y el 9,2%, el PSC.
  
Nel sondéu, tamién se pidió a los encuestaos que citen los trés principales problemes de los catalanes. Nesti casu, el númberu de preguntaos que citen el paru y la precariedá llaboral como ún de los trés principales problemes dispárase casi al 70% de les respuestes.
 
Conxuntura económica
  
Crez el númberu d'encuestaos que define la situación económica catalana y española como mala y bien mala. Nel casu de la catalana, valórenla negativamente'l 69,4% de les respuestes, 3,4 puntos más que na seronda.
  
Sobre la situación económica española, venla mala o bien mala'l 83,7% de los encuestaos, 0,7 puntos más que nel estudiu d'opinión de noviembre. Hai poco optimismu ente la ciudadanía sobro les perspectives de futuru: el 37,9% agora que la situación económica catalana quedará igual.
  
Al preguntar sobre la situación política, el 74,8% de los encuestaos definen el panorama políticu español como malu y bien malu, y el 64,3% dicen lo mesmo sobro'l catalán. Los datos nel barómetru de noviembre tovían yeren peores, polo que'l director del CEO, Gabriel Colomé, atribuyó esta discreta recuperación a que s'averen los comicios autonómicos y a que los partíos empiecen a calecer motores.