El Parllamentu vascu desea l'absolución nel 'casu Egunkaria'

El Parllamentu vascu aprobó una iniciativa na que manifiesta que'l xuiciu a Egunkaria acabe cola absolución d'imputaos y onde muestren la preocupación pola situación.

El PP denunció que l'apoyu del PSE a un testu d'estes característiques ye "algo mui grave", mientres que los socialistes esplicaron que namás plantegen un deséu que va na llinia de la postura del Ministeriu Fiscal.
  
El xuiciu del 'casu Egunkaria', -diariu peslláu nel 2003 por orde xudicial-, acabó'l pasáu día ún na Audiencia Nacional y ta a la espera de sentencia. La Fiscalía pidió l'absolución de los cinco directivos del periódicu procesaos, mientres que l'acusación popular, exercida por Dignidad y Justicia y l'Asociación de Víctimas del Terrorismo, pidió penes d'ente 12 y 15 años de cárcel por un presuntu delitu d'integración n'organización terrorista.
  
El pronunciamientu del Parllamentu vascu aprobóse al traviés d'una enmienda acordada pol PSE y Aralar a una proposición non de llei presentada por esti últimu grupu. El testu definitivu recibió l'apoyu de les dos formaciones firmantes, el PNV y EB, mientres que'l PP y UPyD votaron en contra y EA nun participó na votación.
 
Siguieron l'alderique dende la mesma Cámara, tres de los cinco procesaos; Juan Mari Torrealdai, Iñaki Uria y Martxelo Otamendi, que va tar güei a les 20 hores nel local Cambalache n'Uviéu pa esplicar el casu.
  
Nel primer puntu de la iniciativa, el Parllamentu, ente la retirada de les acusaciones per parte del fiscal, manifiesta'l deséu de que'l xuiciu concluya definitiva y satisfactoriamente cola absolución de los imputaos na llínea apuntada pol fiscal.
  
Nel segundu puntu, la Cámara muestra la so preocupación pola situación llaboral y personal, dende'l zarru d'Euskaldunon Egunkaria, de los acusaos nel xuiciu.
  
Per parte del PNV, Andoni Ortuzar llamentó que "col zarru d'esti diariu quedamos ensin l'únicu periódicu n'eusquera" y destacó que "nun sistema democráticu, el zarru d'un mediu de comunicación ye algo escepcional y bien grave, a pesar de que nel Estáu Español yá se produxo dos veces, primero cola clausura d'Egin, y dempués cola d'Egunkaria.
  
Criticando que "quedamos ensin parte de la llibertá d'espresión", espresó les sos dudes al respeuto de "la posibilidá de llograr una mínima compensación pa les persones afectaes pol procedimientu".
 
Rigor ya independencia
  
El voceru del PSE, José Antonio Pastor, refugó les crítiques d'UPyD y el PP a la supuesta inxerencia que supón esta iniciativa sobre'l llabor de los tribunales y precisó que nel testu nun se plantega esixencia alguna, sinón que namás se muestra "un deséu que va na mesma llínea de lo plantegao pol fiscal". Tamién en respuesta al PP, acusó a esti partíu de cuestionar la independencia del Ministeriu Fiscal "ensin apurrir nenguna prueba clara".
  
Amás, llamentó l'enorme retrasu nel desarrollu del procesu. Sicasí, consideró qu'esti casu "demostró que'l sistema xudicial funciona con rigor y independencia, como asina lo demuestra la retirada de l'acusación pública al entender que nun había razones pa caltenela".
  
El parllamentariu del PP Carlos Urquijo denunció que l'apoyu del PSE a un testu d'estes característiques ye "algo mui grave". Urquijo precisó qu'ésta ye "la segunda actuación más grave del PSE-EE dende la llegada de Patxi López a la Presidencia del Gobiernu vascu, tan solo per detrás de la postura de los socialistes al dexar pa prau los pidimientos de disolución de conceyos gobernaos por miembros de la illegalizada ANV".
 
Tregua d'ETA  
 
El representante popular denunció que'l pronunciamientu apoyáu pol PSE supón una mui grave inxerencia nel poder xudicial. Amás, "atribuyó'l pidimientu de retirada de l'acusación del Ministeriu Fiscal, realizáu nel 2006, a la intención de nun interferir nel procesu de negociación entamáu cola tregua d'ETA entós en vixencia". Amás, pidió al representante d'EA que, en casu de tener pruebes sobre tortures per parte de les Fuerces y Cuerpos de Seguridá del Estáu, les presente a los tribunales.
  
El parllamentariu d'Aralar, Oxel Erostarbe, defendió la inocencia de los procesaos y afirmó que, "independientemente del sen de la sentencia, col zarru del periódicu'l dañu ta fechu". Coles mesmes, enmarcó esti casu "nes actuaciones desarrollaes col argumentu de que too ye ETA", y sorrayó "la importancia de qu'esti tipu de casos nun vuelvan asoceder".
 
Tortures
  
Pela so parte, el parllamentariu d'EA, Jesús Mari Larrazabal, que nun apoyó'l testu por considerar que nun tenía la contundencia necesaria, recordó que dellos de los imputaos denunciaron sufrir tortures y, en respuesta a Urquijo, alvirtió-y "que nun pue pretender que nun me crea les denuncies de tortura realizaes polos acusaos, dao que conoz a varios d'ellos".
  
Amás, retó al parllamentariu popular a denunciálu por calumnies a los servidores del Estáu. "Gustosamente volveré dicir que los servidores del Estáu sirvieron al Estáu torturando", añadió.
  
Dende EB, Mikel Arana manifestó que nesti casu "forzáronse munchos delles investigaciones", y destacó que la Xusticia lenta nun ye xusta. El parllamentariu d'UPyD, Gorka Maneiro, calificó'l testu aprobáu de "escandalosu", al entender qu'atenta contra la separación de poderes.