UNA propón plantes de xeneración de biodiésel a partir de basura

UNA va tratar nel so congresu la presentación d'una moción al Parllamentu, pa estudiar la creación de plantes de xeneración de biodiésel a partir de basura en llugar de la incineradora

El voceru de Mediu Ambiente d'Unidá Nacionalista Asturiana,  Tino Fernández, va proponelo nel congresu que va tener la federación los díes 6 y 7 de Marzu. Fernández sostién que nel mercáu actual existen alternatives bastante meyores qu'una macroincineradora de residuos, "una de les más viables col estáu actual de la tecnoloxía ye convertir los residuos en biocombustibles, tratándolos con bacteries".

Tino Fernández, que trabayó nel llaboratoriu de bioorgánica de la Universidá d'Uviéu, aseguró que "estes tecnoloxíes son muncho más llimpies que la incineradora, qu'amás tienen un efeutu muncho más positivu sobre l'emplegu y que xeneren muncho más valor añadíu qu'utilizar la basura pa consiguir eletricidá, como se va faer si quemamos los residuos".
    
El miembru d'UNA asegura que "estes plantes de xeneración de biodiésel son de menor tamañu y menor costu, pudiendo instalase de forma más desllocalizada colo que se produz un importante aforru en tresporte de residuos, permitiendo amás consolidar población nel oriente y occidente asturianos, puesto que l'escasu emplegu que xenera una incineradora va producise namás na zona centro".
  
Fernández apuntaba tamién qu'un puntu importante ye que "dexaría a Asturies baxar la so dependencia enerxética del petroleu mientres que producir más eletricidá nun vien sinón a collaborar colos problemes derivaos de que se xenere un polu de producción eléctrica n'Asturies, coles sos consecuencies en cableaxes innecesarios y destrucción del nuesu patrimoniu natural".
  
Por estos motivos UNA va plantegar nel so congresu presentar una moción al Parllamentu Asturianu y buscar apoyos ente los grupos políticos que tienen representación na Xunta Xeneral del Principáu, pa que s'estudie esta opción antes de decidise por "una incineradora nefasta".