Razones p'apostatar

Somos un grupu de persones del Conceyu Siero que queremos esplicar la nuestra decisión d’apostatar. Educáronmos na tradición católica y, anque agora nun somos creyentes el nuestru grau de “descreimientu” nun ye uniforme: ateos, agnósticos, non practicantes... Hasta agora o bien nun mos plantegáremos l’apostasía o bien díbemos aplazándolo indefinidamente. Lo que mos emburrió definitivamente a dar el pasu d’exercer esti drechu ye la postura cada vez más belixerante de la cúpula y dirixentes de la Ilesia católica española. Les inxerencies n’asuntos políticos y sociales qu’esceden del ámbitu de la fe (personal o coleutiva) pa llevar a cuestionar decisiones democrátiques de representantes llegalmente escoyíos.
 
Caún de nós tien idees personales, opciones ideolóxiques y vivencies que puen añadir motivaciones particulares a la decisión de que se mos borre de los archivos de la Ilesia católica. Pero lo que mos xune nesti actu d’apostasía ye la necesidá que sentimos toos de nun mirar pa otru llau énte postures manipuladores, totalitaries y represores en temes como la homosexualidá, l’albuertu, el divorciu, l’anticoncepción, la educación. Conocemos a persones dientro de la organización (cures, feligreses...) que son exemplu de solidaridá y d’apoyu a xente desfavorecío y necesitao; respetamos y valoramos el so llabor, pero, nun compartiendo la so fe, pesa más na nuestra decisión la continua y omnipresente actividá de la xerarquía lluchando escontra avances sociales na llinia del respetu, la llaicidá y la convivencia intercultural. La nuestra conciencia nun mos permite que se mos cunte ente los cómplices de campañes qu’ataquen valores que mos paecen básicos nuna sociedá plural y que busquen la protección de sectores sociales sensibles y la construcción d’una sociedá basada na diversidá y el respetu mutuu.
 
Nun podemos ser nin un migayu cómplices nos insultos a los homosexuales, nes desinformaciones sobre l’anticoncepción, na manipulación educativa, na criminalización del albuertu, na discriminación de les muyeres, na marxinación d’otres creyencies, na imposición de métodos decisorios tiránicos, na financiación d’entidaes estremistes y ultraortodoxes, nel despreciu a la llingua asturiana, na permisividá a los abusos sexuales, nel ataque a la llaicidá, na imposición a tola sociedá de símbolos cristianos, na instrumentalización interesada del Estáu...
 
Xosé Firmu García Cosío
Miguel Ánxel Lago Santillán
Simón Blanco Llera
Policarpo Mencía Álvarez
Nel Anxelu Rodríguez Peláez
Llinu Álvarez Santidrián