Radio Sele nun va poder sentise güei pela FM

La emisora n’asturianu nun va emitir güei pela frecuencia modulada pa poder iguar dalgunos probemos técnicos. Dende la direición de Radio Sele cuenten tar yá nel dial mañana.

La cadena pionera na emisión n’asturianu namás va emitir güei vienres per Internet pa iguar dellos problemes técnicos qu’entamaron cola nueva emisión nel 106.1 de la FM, qu’empecipió’l pasáu domingu depués de nueve meses de música en cadena.
 
Esi parón prodúxose pa buscar un sistema d’emisión afayadizu, yá que prohibiéron-yos usar l’enllaz que vía radio usen les demás emisores. Esti nuevu paru, que va ser muncho más curtiu, vien poles interferencies que Radio Sele produz a la emisora local Radio San Martín, de Sotrondiu.
 
El próximu domingu, Radio Sele, va emitir, pela FM y per Internet, el derbi asturianu énte’l Real Uviéu y el Sporting de Xixón B. Será a les 19.00 hores colos comentarios de Nacho González y César del Agua.