Fernán Gonzali Llechosa gana'l I Premiu 'Emilio Trabanco Trabanco'

El Grupu Trabanco y la revista 'La Sidra' concedieron el I Premiu d'Ensayu 'Emilio Trabanco Trabanco' a Fernán Gonzali Llechosa pola so obra, 'El Diccionariu de la Sidra'.

Según esplicaron los organizadores del Premiu, el premiu ta dotáu con 1.250 euros, un llote de llibros valoráu en 250 euros y la publicación de la obra ganadora.
  
El xuráu, presidíu pol doctor n'Economía David Rivas Infante, "valoró la importancia que tien esta obra pa la documentación y recuperación d'espresiones y dichos populares rellacionaos cola cultura de la sidra", esplicaron.
    
'El Diccionariu de la Sidra' recueye más de 500 entraes, documentaess por Gonzali Llechosa mientres un añu d'investigación y trabayu de campu. "Entrevisté y sigo entrevistando a llagareros, chigreros y otres persones venceyaes al sector, qu'apurrieron espresiones tradicionales relatives al procesu d'ellaboración, sistemes de midida, o característiques de la sidra", dixo l'autor.
  
"A pesar de contar con sieglos d'historia, munches d'estes espresiones cuerren el riesgu de desapaecer", en palabres de Gonzali. "D'ehí que, con esta obra, pretenda facer una particular aportación pa evitar la perda d'esti gran patrimoniu oral", apuntó.
  
El llibru va publicase en próximes feches, al empar d'una selección de los meyores ensayos presentaos a esta primer edición. Ello ye que l'oxetu de la revista La Sidra pasa per crear la coleición 'Emilio Trabanco Trabanco' d'ensayos y obres d'espardimientu de toos aquellos elementos que definen la cultura de la sidra n'Asturies.