Fai un añu que s’aprobó’l Plan de Normalización de Cangas del Narcea, criticáu dende sindicatos y Principáu al valorar l’asturianu pa optar a un trabayu na alministración local.

El Plan aprobóse en febreru de 2009, colos votos a favor del equipu de gobiernu d’IU-BA-Los Verdes, encabezáu pol alcalde José Manuel Martínez,  y del grupu del PP, votando a la contra’l PSOE.
 
Darréu, la vocera del Principáu, Ana Rosa Migoya, aseguraba que la propuesta de Cangas del Narcea de valorar la conocencia de la llingua asturiana nes oposiciones diba a la contra de la Llei d'Usu y yera illegal, yá que namás se podía valorar la conocencia del asturianu nes convocatories de seleición de les alministraciones pa los puestos que tengan rellación cola promoción o espardimientu de la llingua asturiana, pero non pal restu.
 
Tamién echaron lleña al fueu nel asuntu los sindicatos, que vieron la midida como “problemática”. Asina, un miembru d’UXT de Cangas del Narcea dixo que lo único que se diba algamar yera crear munchos problemes al propiu Ayuntamientu y a aquellos trabayadores que puean optar a una plaza. Mientres que dende Comisiones Obreres, apuntaben que pol fechu de falar una llingua nun se podía aumentar la puntuación nuna oposición determinada.
 
La responsable del Serviciu de Normalización de Cangas, Mónica Rodríguez Riesgo, desplicaba fai un añu nuna entrevista a Asturies.com, que simplemente diba valorase l’asturianu na midida que se considere pa cada casu, “tal ya cumo se puede valorar cualquier outru cursu de formación complementaria sía d’inglés, d’ofimática ou de corte ya confección, nun veo que yía lo polémico nin lo discriminatorio”.

Pel so llau, l'Aconceyamientu de Xuristes pol Asturianu (AXA) afitaba que la midida concasaba dafechu cola llegalidá definida na Llei d'Usu. Mientres que dende’l Conceyu de Ḷḷena, gobernáu tamién por IU-BA-Los Verdes, esclariaben que taben d’alcuerdu cola norma, animando a tolos conceyos d’Asturies a facer lo mesmo y diciendo qu’ellos tamién diben entamar a valorar l’asturianu.
 
Y un añu depués d’entamar a ponese en práutica y de xenerar tanta polémica, el Plan de Normalización Ḷḷingüística de Cangas de Narcea nun xeneró nengún conflictu social nin problemes ente la población del conceyu de mayor superficie del país.
 
Según Mónica Rodríguez el plan siguió alantre, “en todas las convocatorias de puestos que tuvienon ya tienen atención al públicu de dalgún tipu valórase con 1 puntu ou 2 el conocimientu d'asturianu ya, hasta'l momentu, nun houbo niuna polémica más”.
 
A la fin, la polémica quedó llindada a les opiniones de la vocera del Gobiernu y los sindicalistes, “consideraciones inoportunas de la que s'aprobóu'l plan, que valoranon sin siquiera conocer el conteníu”, sentencia Mónica Rodríguez.