La Xunta esixe a l’Alministración que defenda la Xunta de Toponimia

La Xunta pola Defensa de la Llingua vien d’esixir a la Direutora Xeneral de Política Llingüística que salga al pasu de los que quieren “valtar el procesu de recuperación toponímica”.

Según l’asociación, les campañes entamaes por un mediu de comunicación contra’l procesu de recuperación toponímica “piden una respuesta clara de les autoridaes correspondientes”, señalando al Gobiernu asturianu y la Direición Xeneral de Política Llingüística, “que tendrá qu’aclarar públicamente toles veces que faiga falta cómo ye esti procesu y qué criterios se manexen”.
 
Pa la Xunta, el llabor de la Xunta de Toponimia merez “tol respetu y consideración y nun pue volvese atrás por una campaña mediática preparada a costafecha dende la direición d’un mediu de comunicación”.
 
Dende l’asociación apunten que cuando se tien el poder mediáticu ye fácil mover los filos pa poner un pueblu enteru en contra del topónimu qu’ellos mesmos usen. “Nun ye más que la demostración de lo muncho que falta por recorrer pa que los prexuicios llingüísticos contra lo propio vaigan desapaeciendo”, señalen.
 
La Xunta pola Defensa de la Llingua recuerda qu’un topónimu tradicional “ye’l que ye” y el llabor de la Xunta de Toponimia ye recuperalu y oficializalo “porque asina lo manda la llei”. Esclariando que sería pergrave qu’una entidá que se tien que basar en criterios científicos y de rigor, tuviera que desdicise y empezara a volvese atrás de los alcuerdos tomaos cada vez que sal un titular de periódicu.
 
Con too, dende la Xunta recuerden que’l procesu de recuperación toponímica tien que se basar non solo na oficialización de les formes tradicionales sinón tamién en poner les bases pa que la xente nun s’avergüence d’elles. “De poco val facer campañes de concienciación si’l mesmu Gobiernu asturianu o la RTPA nun usen esos topónimos oficiales”, sentencien.