Denuncien la "muerte illegal" de cuatro llobos en Sobrescobiu

Organizaciones ecoloxistes presentaron nel Xulgáu de Llaviana denuncies por un presuntu delitu de prevaricación al abatise dellos llobos de "forma irregular".

Según les organizaciones denunciantes, los fechos asocedieron el pasáu día 15 de payares del 2009 en terrenos pertenecientes a la Reserva Rexonal de Caza de Sobrescobiu, asitiaos nel interior del espaciu natural protexíu del Parque Natural de Redes.

Foi entós cuando tuvo llugar una batida de caza mayor na qu'intervino una cuadriella cazadores perteneciente a l'Asociación 'El Rebeco' de Cabanaquinta, acompañaos por un Guarda Rural de la Conseyería de Mediu Ambiente del Principáu, como persona responsable d'entamar, dirixir y supervisar el desarrollu de l'actividá cinexética programada.
  
Los ecoloxistes indicaron qu'a pesar de que l'autorización alministrativa puramente otorgóse pa la captura de venaos, los cazadores denunciaos escorrieron y dieron muerte illegalmente a cuatro exemplares de Llobu ibéricu nes proximidaes del llugar denomináu 'La Inverniza', en Sobrescobiu, cola complicidá del funcionariu públicu presente, "que faltando a la obligación del so cargu, dexó intencionadamente de promover la persecución de los responsables de los fechos".
  
N'abatiendo a los cuatro exemplares de llobu, siempres según el relatu de los denunciantes, "los participantes nos fechos fotografiáronse colos animales muertos y apoderáronse de los restos de los mesmos cola cuenta de proceder a la so naturalización, a pesar de que la caza o aprovechamientu cinexéticu de la especie llobu ibéricu ta espresamente prohibida nel Principáu d'Asturies".
  
De los fechos y de los sos autores tien conocencia la Conseyería de Mediu Ambiente, Ordenación del Territoriu y Infraestructures, "pero magar ello, nun se fixo público hasta la fecha l'adopción de nengún tipu de midida alministrativa o disciplinaria nin contra los cazadores participantes nel socesu rellatáu nin contra'l guarda rural implicáu nel mesmu, "que nesti momentu nun s'alcuentra en situación de serviciu activu, dao que díes más tarde de producise les presuntes actuaciones delictives descrites cesó en dichu serviciu activu al aportar a la xubilación, destaca'l comunicáu fechu públicu polos denunciantes".
  
Asina, de resultes de los fechos y hasta la fecha, cinco asociaciones ecoloxistes -la Coordinadora Ecoloxista d'Asturies, l'Asociación pa la Defensa Xurídica del Mediu Ambiente Ulex, Ecoloxistes n'Aición d'Asturies, l'Asociación pal Caltenimientu y Estudiu del Llobu Ibéricu ASCEL y la Coordinadora Ornitolóxica d'Asturies- presentaron nel Xulgáu de Llaviana delles denuncies contra los miembros de la cuadriella de cazadores y contra'l Guarda Rural