Joseba Egibar diz que si nun s'almite al pueblu vascu, el conflictu siguirá

El voceru del PNV nel Parlamentu vascu y presidente del GBB afirmó que, "si l'Estáu español nun almite la esistencia d'otros suxetos políticos, el conflictu políticu va siguir".

N'asegurando que "el drechu a decidir ye'l motor del futuru", Egibar dirixióse al lehendakari, Patxi López, pa dici-y que "la trampa y la verdadera gravedá d'esti asuntu ye que los que se dicen demócrates prohíban escuchar la voz de la ciudadanía".
 
El dirixente nacionalista refirióse a les manifestaciones d'ayeri de López, nes qu'apuntó que la decisión del Tribunal d'Estrasburgo de nun almitir a trámite'l recursu del PNV contra l'anulación de la consulta d'Ibarretxe demuestra que nun se frayó nengún derechu fundamental, sinón que se trataba d'una iniciativa trampona".
  
"La voz de la ciudadanía nun ye trampa", aseguró Joseba Egibar, p'afirmar que "podrá prestate o non, pero favorecer la espresión ciudadana diz más a favor de la persona o les instituciones que lo favorecen, no que se refier al so nivel y condición democrática, que del que basándose en nun sé qué principiu, non sólo lu torga, sinón que lu prohíbe".
  
Amás, indicó que, de primeres, "la non almisión del recursu per parte del Tribunal Européu de Drechos Humanos, nun respuende nin siquier a la demanda que formuló'l PNV". D'esta forma, mostró la so disconformidad cola resolución xudicial porque "evita contestar a les formulaciones plantegaes pola formación nacionalista".
  
"Esto entama cola aprobación d'una Llei de Consulta nel Parlamentu vascu, que s'aprobó'l 27 de xunu del 2008. Entós, automáticamente ye'l presidente del Gobiernu, José Luis Rodríguez Zapatero, el que provoca la suspensión. Y, dempués, el Constitucional, nun tiempu récor, declárala inconstitucional y anúlala", señaló.
  
Al so xuiciu, ehí hai qu'asitiar el tema porque recurrir a Europa yera la salida que quedaba al PNV depués d'un percorríu bien revesosu, porque refugaron hasta la defensa xudicial a los partíos énte'l Constitucional".
  
Nesti sen, esplicó que, "con independencia de too ello, hai un tema políticu, que ye, d'alguna forma, el raigañu del denomináu conflictu políticu, porque'l Gobiernu español diz que namás esiste un suxetu políticu con capacidá de decisión, que ye'l pueblu español, y nun ye a introducir, a la lluz del principiu democráticu, que puean esistir otros suxetos tamién con derechu a decidir.
  
Nesti contestu, Egibar sorrayó que "les consultes, seyan éstes vinculantes o non, que nesti casu, amás, yera una consulta non vinculante, son instrumentos dientro del corpus del derechu a decidir".