Conceyu y equipu van roblar un nuevu conveniu de promoción de la imaxe de Xixón, colo que’l Sporting llucirá per primer vez el topónimu n’asturianu na so equipación oficial.

L’alcuerdu supondrá la renovación por cuatro años del conveniu, que reportará’l equipu unos ingresos de 2.050.000 euros. Con ello, el Sporting llucirá per primer vez el topónimu tradicional de la ciudá. Sicasí, Xixón apaecerá namás nel pantalón, mientres el llogotipu castellán de la ciudá, “Gijón”, será muncho más visible na camiseta.
 
Gijón/Xixón
 
Foi n’ochobre de 2009 cuando’l Conceyu presentó la campaña turística qu’incluyía’l nuevu llogotipu de la ciudá; “Gijón, Asturias con sal”. La campaña tenía un coste d’unos 130.000 euros pa promover la imaxe de la ciudá a nivel estatal ya internacional.
 
Asina, un centenar d’autobuses públicos y 500 mupis españoles lleven la imaxe de Xixón, pero namás en castellán. Fechu que foi criticáu pola propia Xunta pola Defensa de la Llingua, que denunció l’arrequexamientu de la llingua asturiana nes campañes de promoción entamaes pol Conceyu, “lo que non solo incumple lo previsto na Ordenanza Municipal sobre l’usu de la Llingua Asturiana sinón, inclusive, la toponimia oficial aprobada cuantayá pol Conceyu y pol Gobiernu asturianu".
 
Gracies a les crítiques, dende’l Conceyu entamó a usase tamién el topónimu n'asturianu. Sicasí, como pue vese nesta campaña, la discriminación positiva siempre ye haza’l llogotipu en castellán.