Unidá Nacionalista Asturiana celebra’l próximu 6 y 7 de marzu, el congresu que quier ser “puntu de partida pal afitamientu de l’alternativa política asturiana qu’UNA representa”.

Dende’l pasáu llunes, los militantes d’UNA convocaos al II Congresu de la organización, tán recibiendo’l testu de la ponencia política, “consensuada depués de más d’un mes d’alderique”, señalen.

Según indiquen dende la organización, la militancia tuvo oportunidá de valorar, iguar y matizar les propuestes del borrador que, dende la Comisión encargada pola Xunta Xeneral de la organización, se tien ellaborao pa marcar la llinia política d’UNA a lo menos hasta les elecciones de 2011. “Na ponencia faise un análisis de la realidá social y política asturiana, pa darréu d’esponer les alternatives que dende UNA se proponen a la situación”, indiquen.

Según el Coordinador Xeneral d’UNA, Miguel Ánxel Díaz, “nel periodu d’enmiendes desarrollóse sobre manera la tercer parte de la ponencia, dedicada a la estratexa d’UNA, especialmente la que cinca a la estratexa de la organización de cara a les eleiciones de 2011 y a la política de la organización nos conceyos”.

El Coordinador matizó que “camentamos que se fizo un gran esfuerzu d’análisis de la sociedá asturiana, de flexibilidá alloñada de los dogmatismos, y de reflexón sobre les meyores estratexes pa caminar nel afitamientu del nuestru proyeutu”.

Según Díaz, “trátase de sumar voluntaes pa facer de los alcuerdos que se tomen resultaos bultables, que ye lo que demanda la nuestra base social y los más de los asturianos y asturianes que busquen una alternativa a los bloques PSOE-IU y PP, y n’UNA, como pue vese na ponencia, vamos ponenos a trabayar nesa llinia”.

Pa finar el representante de la organización matizó que “tovía queda una selmana pa recibir les caberes enmiendes, que nesti segundu turnu van tener de tar más apoyos que nel periodu inicial pa poder llegar a ser discutíes nel Congresu”.

El Congresu d’UNA va celebrase nel auditoriu d’Uviéu en dos sesiones, a lo llargo de tola xornada del sábadu 6 y la mañana del domingu 7 de marzu.