L'alcalde de Piloña destaca'l "compromisu" cola llingua

L'alcalde de Piloña, Camilo Montes Díaz, destacó ayeri'l compromisu d'esti Conceyu col asturianu, demientres la firma d'un conveniu cola presidenta de l'Academia Ana Cano.

Según informó'l Serviciu de Normalización Llingüística de Piloña, "l'alcalde fixo un discursu n'asturianu  -dalgo qu'allabó la presidenta de l'Academia de la Llingua-, nel que resaltó'l compromisu del Conceyu pa cola llingua y coles actuaciones que se tán desarrollando.
 
Ente les actuaciones destaquen la oficialización de la toponimia, "un procesu llargu, pero que se ta faciendo de forma gradual y continua". Amás, señalen l'abertura del primer Serviciu de Normalización Llingüística del Oriente d'Asturies, el de la Mancomunidá del Sueve, con sede en L'Infiestu.

Ana Cano, pela so parte, comprometióse nel so discursu a asesorar al Conceyu, amás d'utilizar como escenariu l'Ayuntamientu piloñés en dalgún de los actos qu'organice la propia Academia.
  
L'oxetivu del conveniu ye trabayar conxuntamente na promoción, espardimientu y dignificación social del usu del asturianu nel conceyu. L'actu enmarcóse na celebración del 'Día internacional de la llingua materna'.
 
Pa festexar esta fecha, la Casa de Cultura de L'Infiestu acueye tamién la esposición 'Agua, arroz y maíz' hasta'l día 1 de marzu. La muestra ta basada nel llibru homónimu que, escritu por Berta Piñán y ilustráu por Elena Fernández, ganó la primer edición del Premiu 'María Josefa Canellada' de Lliteratura Infantil y Xuvenil 2008, convocáu pola Conseyería de Cultura y Turismu del Principáu d'Asturies