Ecoloxistes n'Acción afirma que la xeneración eléctrica vuelve baxar

Ecoloxistes n'Acción afirmó que la xeneración eléctrica cayó sobre l'añu anterior en casi un 12%, unos datos que cuestionen "tol planteamientu enerxéticu asturianu".

Los ecoloxistes destacaron qu'a la vista de los datos publicaos pola Sociedá Asturiana d'Estudios Económicos y Industriales, a fecha 16 de febreru del 2010, la xeneración ecléctrica asturiana algama'l segundu nivel más baxu de les últimes dos décaes, "con un descensu de más del 40% sobre l'añu 2000". Esti descensu va uníu al amenorgamientu de la xeneración en centrales térmiques de carbón, con un descensu del 50% sobre esi mesmu añu.
  
Ecoloxistes n'Acción destacó qu'esti descensu "nun pue achacase al comportamientu de la demanda, que siempre foi creciente, nun siendo l'añu 2009". "Ta claro que la causa foi'l cambiu del panorama enerxéticu nacional, cola instalación de nueves centrales de gas, y con una estructura de xeneración muncho más distribuyida, según la cada vez mayor participación de les enerxíes anovables, especialmente la enerxía eólica", destacaron.
  
Destaquen amás qu'a la vista d'estos datos, y teniendo en cuenta que, mientres la producción baxó, la demanda interna subió a lo llargo del 2009 un 12%, too paez indicar, a falta de los datos de perdes del sistema, bombéu, y otres estayes, "que'l balance asturianu va ser, a diferencia de lo asocedío mientres años, negativu, con más importación qu'esportación".
  
"Esta situación cuestiona tol plantegamientu enerxéticu asturianu, especialmente'l referíu a les llinies eléctriques de tresporte, dao que, si foi a soportar ensin restricciones, casi'l doble de xeneración que nesti momentu, nun va tener nengún problema n'absorber llixeros aumentos en xeneración n'enerxíes renovables, sin que, en nengún casu puean utilizase, esti tipu de proyectos, como xustificación pa la instalación de nueves redes de tresporte", acabó'l comunicáu.