41 periódicos en catalán xúnense pa que TV3 puea vese en Valencia

41 periódicos en catalán publiquen güei un editorial conxuntu nel que piden que TV3 puea vese en Valenciana, amás de la creación d’un “marcu nacional de comunicación catalán”.

'Fem-ho possible: per TV3 i la llengua catalana' (Faigámoslo posible: por TV3 y la llingua catalana) reclama'l sofitu de los ciudadanos a la iniciativa Televisión ensin fronteres, que quier llevar al Congresu de los Diputaos l’alderique sobre la presencia de televisión catalana na Comunidá Valenciana, anque la iniciativa va más allá.
 
L’editorial conxuntu señala que’l futuru del catalán pasa por crear "un marcu nacional de comunicación" y l’abolición de les fronteres y la llibre circulación de la cultura “ente tolos territorios que-y son propios”.

Ente les publicaciones qu’espublicen l’editorial tán 'Avui', 'El Punt', 'Diari de Balears', 'Segre', 'El 9 Nou', 'Diari de Tarragona', 'Diari de Sabadell', al par de la Associació de Publicacions Periòdiques en Català (Appec) y la Associació Catalana de la Premsa Comarcal (ACPC).

La recoyida de firmes pa la propuesta, que cuenta col sofitu de los ex presidentes de la Generalitat Jordi Pujol y Pasqual Maragall, precisa de 500.000 robles, llevando yá 400.000 recoyíes. L'editorial termina per pidir a la ciudadanía que tea "al altor del retu" y ayude a consiguir les firmes restantes pa "faer posible un pasu alantre".