Langune quier facer del País Vascu un referente na industria de llingües

L'asociación Langune entamó funcionar pa crear un cluster de la industria llingüística vasca col fin de convertir al País Vascu en referente européu nel ámbitu de la Industria de les Llingües.

Tienen como referente l'añu 2015, cuando'l sector del tratamientu de les llingües va crecer n'Europa un 10%, según indicó Gipuzkoa Berritzen-Innobasque, impulsor d'esta iniciativa, nun comunicáu.
  
Gipuzkoa Berritzen-Innobasque esplicó que Langune surde como frutu del procesu de reflexón desarrolláu dende l'añu 2008 y promovido por esta entidá. Nél axuntáronse los principales axentes del sector d'actividá responsable del diseñu, la producción y la comercialización de productos y servicios rellacionaos col tratamientu de les llingües, pa realizar un estudiu de mercáu y una previsión de les futures llinies d'actuación.
  
Según indicó, los resultaos d'esti análisis punxeron de manifiestu que la Industria de les Llingües ye un sector económicu importante nel País Vascu, y que pue reforzase tovía más promoviendo la cooperación.
    
Nesti sen, destacó que Guipúzcoa ye una sociedá en gran midida billingüe y, amás d'ello, ye nesi territoriu onde más se desarrolló la industria de servicios y productos rellacionaos cola xestión de les llingües.
  
Nesti ámbitu atópense, ente otros, la traducción, la interpretación, la llocalización de software, la xestión terminolóxica, los sistemes de xestión de redacción técnica, documentación multilingüe y de los sos fluxos de trabayu, y les ferramientes de tecnoloxía llingüística como, por exemplu, los correctores ortográficos y gramaticales, los sistemes de conversión de testu en fala y de fala en testu, los sistemes de traducción automática, y la enseñanza d'idiomes y los sos recursos.
  
El principal oxetivu de Langune va ser tornar al País Vascu en referente européu nel ámbitu de la Industria de les Llingües, pa lo que deber estructurar el sector económicu, proporcionar axentes abondo, reforzar la mediación y promover y collaborar na internacionalización del sector.
  
Con esti fin, l'asociación punxo en marcha la ellaboración d'un plan estratéxicu de tres años que va recoyer les iniciatives a desarrollar ante los principales retos del sector, según los pasos a dar pa llegar a esta estructura, de manera que Langune supón el primer pasu pa la creación d'un cluster.
 
Mercáu
  
Gipuzkoa Berritzen-Innobasque sorrayó que la xestión de la llingua ta garrando cada vez más importancia na economía, y la movilidá aumentó la interaición ente les persones y les empreses y, nesti momentu, el mercáu de servicios llingüísticos a nivel mundial valórase en 10.536 millones d'euros, correspondiendo'l 43 por cientu del mercáu global, unos 4.500 millones d'euros, al mercáu européu.    
  
Amás, destacó que según l'informe de la Comisión Europea "The size of the language industry in the EU", la xubida añal ente los años 2008 y 2015 va ser de polo menos un 10 por cientu, a lo qu'añadió que nestos momentos la Industria de les Llingües de Guipúzcoa da emplegu a 1.575 pesonas y, mientres l'últimu añu, llogró unos ingresos superiores a los 54 millones d'euros, qu'equivalen polo menos al 0,25 por cientu del PIB.