“Morristi cuando nun te fale naide, antós nun te veremos enterrada”

Javier Cayado Valdés foi’l ganador del concursu “Declara’l to amor pola llingua”, pal que se presentaron más de cien testos y col que se quería celebrar el Día de la Llingua materna”.

El testu que diz “Crecisti camudando de viaxeros, respirada nos picos y na mina. Vivisti pelos mares y pel aire, gayaspera, a vegaes casi guardada. Morristi cuando nun te fale naide, antós nun te veremos enterrada”, presentáu col alcuñu Sogallardi foi l’escoyíu polos veceros de la Casa Posafuelles.
 
El ganador recibió un premiu únicu dotáu con un llote de productos de Xunta pola Defensa de la Llingua Asturiana y Xunta Moza. Amás, la so obra va convertise n’imaxe de les campañes de reivindicación qu’empobine l’asociación.
 
Col actu, la Xunta pola Defensa de la Llingua, quixo festexar el Día internacional de la Llingua Materna, “un cumpleaños nel que festexamos la llegada d’otru añu, otru añu más que-y ganamos al quedar mudos y al quedar colos pantalones baxaos delantre la xente que nun-y tien apreciu a la nuestra llingua y, pa enriba, tira piedres contra’l so teyáu al nun aceptar la so oficialidá, una de les poques ferramientes que nos pue asegurar la vida d’esti idioma”.
 
Xunta Moza fai una valoración positiva en cuantes a la participación nel concursu: “mediu centenar de persones quixeron dexar la so declaración d’amor pola llingua y hubo xente que participó con más d’una creación”. Del mesmu mou quieren agradecer a toles persones que sofitaron y participaron nel concursu, amás de nel actu cultural en La Casa Posafuelles y dicen esperar ameyorar pal añu qu’entra.
 
Tanto la obra ganadora, como les otres nueve finalistes pueden lleese na páxina web de la XPDLA.