Piloña y Academia roblen un conveniu pa fomentar la llingua

L'alcalde de Piloña, Camilo Montes, y la presidenta de l'Academia, Ana Cano, firmarán un conveniu esti llunes pa promover y espardir l'usu del asturianu.

L'Ayuntamientu quier celebrar asina esti añu'l "Día Internacional de la Llingua Materna". Pa ello prepárense con dos actos "mui especiales y significativos": la firma del conveniu de collaboración y l'abertura d'una esposición basada nel llibru 'Arroz, agua y maíz', de Berta Piñán, ganador de la primer edición del premiu 'María Josefa Canellada' nel 2008, convocáu pola Conseyería de Cultura.
  
El conveniu va firmase'l llunes, día 22, nun actu públicu na Casa La Cultura de L'Infiestu, "col envís de trabayar conxuntamente na promoción, espardimientu y dignificación social del usu del asturianu nel conceyu de Piloña", según esplicó'l Serviciu de Normalización Llingüística al traviés d'una nota prensa.
  
La muestra de la esposición "Arroz, agua y maíz" basada nel llibru homónimu que, escritu por Berta Piñán y ilustráu por Elena Fernández, ganó la primer edición del Premiu 'María Josefa Canellada' yá pue visitase, y va tar na mesma Casa la Cultura hasta'l 26 d'esti mes de febreru.