"Tierra" de Xera, meyor cantar n'asturianu de 2009

El cantar “Tierra”, de los uvieinos Xera foi escoyíu ayeri en Mieres como’l meyor n’asturianu del 2009 y será l’encargáu de representar a Asturies nel Festival Liet International.

El xuráu, compuestu pola escritora Sofía Castañón, la cantante Anabel Santiago, el coordinador del Festival Liet International, el frisiu Onno Falkena, que dio un discursu na gala dafechu n'asturianu, los críticos Aurelio Argel y David Serna y la Direutora Xeneral de Política Llingüística, Consuelo Vega, decidió que la fusión de folk y música electrónica de “Tierra” yera’l meyor cantar del añu.
 
Ente los finalistes a esti Premiu convocáu pola Conseyería de Cultura y celebráu ayeri nel Auditoriu Teodoro Cuesta de Mieres, taben tamién Brandal, Dixebra, Misiva y Lafu&Rebeca, a los que-y fixo los coros Alfredo González, ganador del añu pasáu.
 
El grupu ganador ñació en Trubia en 2005, y hasta’l momentu tien espublizaos dos discos, en 2006 “Lliendes”, el so discu de debut, y l’añu pasáu ”Tierra”, onde se recueye’l cantar ganador que tamién da títulu al discu.
 
Xera viaxará’l próximu 20 de payares a Escocia, onde va celebrase una nueva edición del festival de llingües minoritaries Liet International, que cuenta grabar la prestixosa cadena BBC. Asturies ye la primer comunidá llingüística qu’escueye un representante pal fesival.
 
La TPA va tresmitir güei domngu a les 21.30 hores la gala del Premiu al Meyor Cantar, que foi presentada polos escritores y periodistes Vanessa Gutiérrez y Naciu Varillas. El próximu xueves a les 11.45 de la mañana, la canal pública fairá tamién una reemisón de la gala.